Shyǵys óńirinde Táýelsizdiktiń shırek ǵasyrlyq merekesi keń kólemde atalyp ótti. El Táýelsizdiginiń 25 jyldyǵy aıasynda oblystyń aýdandary men qalalarynda birqatar áleýmettik nysandar paıdalanýǵa berildi. Máselen, Zyrıan aýdanynda ashylǵan 80 oryndyq ońaltý ortalyǵy múmkindigi shekteýli azamattarǵa medısınalyq qyzmet kórsetedi. Buǵan deıin Zyrıan aýdanynyń turǵyndary em-dom alý úshin oblys ortalyǵyndaǵy ońaltý ortalyǵyna arnaıy keletin. Endi zyrıandyqtar psıhologııalyq qoldaý kórsetý, fızıoemdeý jáne emdik dene shynyqtyrý bólmelerimen, sondaı-aq vakýýmdyq, aspaly emdeý júıesi apparattarymen jáne jattyǵý quraldarymen jabdyqtalǵan ońaltý nysanynyń qyzmetin paıdalana alady.
Jańa nysannyń ashylý saltanatyna oblys ákiminiń orynbasary Ásem Núsipova qatysyp, áleýmettik áleýetti arttyrý jolynda memlekettik qoldaý jyldan jylǵa artyp kele jatqanyn jetkizdi.
Aıta ketken lázim, bul nysannyń qurylysy uzaq ýaqytqa sozylǵan edi. Oblys ákimi D.Ahmetov nazarǵa alǵanan keıin jandanyp sala bergen qurylysqa respýblıkalyq bıýdjetten 409,9 mıllıon, oblystyq bıýdjetten 22,8 mıllıon teńge jumsaldy.
Sonymen birge Rıdder qalasynda 200 oryndyq kópsalaly sport kesheni ashyldy. Keshenniń ashylý saltanatyna oblys ákiminiń orynbasary Qýat Tumabaev qatysty. Quny 180 mıllıon teńgeni quraǵan keshende basketbol, fýtbol, voleıbol syndy sport túrlerinen bólek, jeńil atletıka, kúres, dzıýdodan jattyǵý jumystary júrgiziledi. Sondaı-aq, jýyqta keshenge qarasty kórkem gımnastıka mektebi ashylady dep josparlanýda.
– Olımpıadalyq sport túrine jatatyn kórkem gımnastıkaǵa jastar arasynda qyzyǵýshylardyń qatary artyp keledi. Sondyqtan aldaǵy ýaqytta kórkem gımnastıka mektebin ashýdy josparlaýdamyz, – dedi Rıdder qalalyq mádenıet, tilderdi damytý, dene shynyqtyrý jáne sport bóliminiń basshysy Almas Nurǵalıev.
Keshenniń ashylý saltanatyna oraı, 2003-2004 jyly týǵan jasósipirimder arasynda shaǵyn fýtboldan oblys birinshiligi ótti.
Dýman ANASh, «Egemen Qazaqstan».
Shyǵys Qazaqstan oblysy