Keshe Astanadaǵy Qazaqstan Respýblıkasy Tuńǵysh Prezıdenti mýzeıinde elimiz Táýelsizdigi men Qazaqstan ulttyq olımpııalyq komıtetiniń 25 jyldyǵyna arnalǵan sýretshiler konkýrsynyń qorytyndysy shyǵaryldy.
Konkýrs Qazaqstan ulttyq olımpııalyq komıtetiniń prezıdenti Tımýr Qulybaevtyń bastamasymen uıymdastyryldy. Ol beıneleý óneri arqyly sportty nasıhattap júrgen otandyq sýretshilerdiń shyǵarmashylyqtaryna qoldaý kórsetý maqsatynda ótkizildi. Al baıqaý shartyna sáıkes, oǵan qatysqan týyndylar Qazaqstan sportynyń 25 jyldaǵy jetistikteri men olımpızm ıdeologııasyn beıneleýleri tıis bolatyn. Nátıjesinde, jeti aıdyń ishinde konkýrsqa elimizdiń kásipqoı sýretshileriniń 30-ǵa jýyq eńbegi kelip tústi.
Sarapshylar komıssııasy osy jumystardy saralaı kelip, Beıbit Ásemquldyń «Jarqyn bolashaq» atty kartınasyn birinshi orynǵa laıyqty dep tapty. Osy eńbegi úshin qylqalam sheberine arnaıy sertıfıkat pen 5 mıllıon teńge tartý etildi. Syılyǵy 3 mıllıon teńgelik ekinshi oryn «Samǵaý» degen polotnosyn usynǵan Jeńis Nurlybaevqa berildi. Qazylar alqasy sondaı-aq, 1 mıllıon teńgelik sertıfıkaty bar úshinshi oryndy «Jeńil atletıka» degen eńbegimen kelgen Sembiǵalı Smaǵulovqa tapsyrdy. Konkýrsqa qatysýshylardyń qalǵandary Ulttyq olımpııalyq komıtettiń yntalandyrý syılyǵyn aldy.
Talǵat RAIYMBEK,
«Egemen Qazaqstan»
ASTANA