Selınograd aýdanyndaǵy «Rodına» aýylynyń mektep oqýshylary qýanysh qushaǵynda. Munda jumys tehnıkasy kabınetiniń tanystyrylymy ótkizildi. Bul tamasha da asa paıdaly tálim ordasyn barlyq qajetti jabdyǵymen «Rodına» Agrofırmasynyń» dırektory, Qazaqstannyń Eńbek Eri Ivan Saýer tartý etti.
Jańa jumys tehnıkasy kabınetinde oqýshylar fızıka, ınformatıka, matematıka, taǵy basqa pánder boıynsha ózderiniń bilimderin zamanalyq talaptar deńgeıinde jetildirýge múmkindik alady. Máselen, matematıka boıynsha baǵdarlamalar túzý arqyly algorıtmder syryna qanyǵýǵa, ınformatıka salasynda kúrdeli baǵdarlamalarǵa boılaýǵa bolady. Sondaı-aq, aýyl balalary joǵary tehnologııalyq júıeler syryn uǵynyp, ıgi armandaryna jol salatyny da anyq.
Aýyl balalarynyń qýanyshyna jergilikti turǵyndarmen birge Parlament Májilisiniń depýtaty Iýrıı Tımoshenko, Qazaqstan halqy Assambleıasy Tóraǵasynyń orynbasary Eraly Toǵjanov, Selınograd aýdanynyń ákimi Malǵajdar Tátkeev te ortaqtasyp, zamanalyq bilim jolynda tabystar tiledi.
Baqbergen AMALBEK,
«Egemen Qazaqstan».
Aqmola oblysy