Brıtandyq VVS News álemdik deńgeıdegi estrada juldyzy bolýy múmkin Qytaı ánshisi týraly kólemdi maqala jarııalady. Djeın Chjan - Qytaıdyń mega juldyzy, al sońǵy áni oǵan Qytaıdan shyqqan birinshi álemdik sýperjuldyz bolýǵa múmkindik beredi, dep jazady basylym.
Maqala avtorynyń habarlaýy boıynsha, Djeın Chjan eń alǵash 2005 jyly Qytaı telearnalarynyń birinde ótken Super Girl án baıqaýynda ekinshi oryn alyp, úlken sahnaǵa aıaq basqan. Ol óziniń vokaldyq dıapazonymen kópshilikti tańǵaldyryp, "Nota delfıni" dep atalyp ketti. Al Qytaı elinde bul sleng joǵary notalardy ala alatyndarǵa qatysty aıtylady eken. Bul ánshiniń halyqaralyq deńgeıde tanylýyna múmkindigi mol. Sebebi ol aǵylshyn tilinde ánder jazdyrady. Bir kezderi Opra Ýınfrıdiń shoýyna da qatysqan eken.
Chjannyń "Dust My Shoulders Off" atty sońǵy áni oǵan álemdik deńgeıdegi tanymaldylyqqa qol jetkizýge septigin tıgize alady. Sonymen qatar Djeın Chjan kelesi jyly sáýirde aǵylshyn tilindegi alǵashqy albomyn da jaryqqa shyǵarmaq. Sol kezde de bul trektiń mańyzdy ról oınaıtyny sózsiz. Sebebi qazir bul ánniń beıneklıpi YouTube vıdeohostınginde 6,5 mıllıonǵa jýyq qaralyp, ITunes dıagrammasynda alǵashqy bestikke kirgen. Tómendegi beıneklıpte ánshi tanymal óner týyndylaryna parodııa jasaıdy.
"Men qytaı ánshisimin. Biraq bul án aǵylshyn tildi aýdıtorııaǵa arnalǵan. Al vıdeony ártúrli mádenıet ókilderi túsinetin mazmunda túsirý kerek boldy", deıdi Chjan VVS-ge bergen suhbatynda. Onyń aıtýynsha, bul vıdeo 48 saǵattyń ishinde túsirilgen.
"Túsirilim kezinde maǵan qaıta-qaıta boıanýǵa týra keldi. Árıne, makııajdy ketirý qıyn. Biz túsirilimdi bitirgen kezde meniń betim isip ketti", - deıdi ánshi. Biraq bul vıdeo qytaılyqtar tarapynan synǵa ushyraǵanyn daı aıta ketý kerek. Soǵan baılanysty beınebaıan rejısseri taıvandyq Lıao Djen Shýaı "Juldyzdar mýzykalyq klıpterde bı bılep, ádemi, tartymdy bolǵanynyń sókettigi joq", deıdi.
"Men oǵan kórermender seni kórip, ózderin esterine alýy kerek. Olarǵa seniń erjúrek ánshi ekenińdi, jańashyldyqqa bara alatynyńdy kórsetkim keledi dep aıttym. Sebebi amerıkalyq naryqqa shyǵý úshin munyń mańyzy zor", deıdi ol.
Kóptegen mamandar bul jaǵdaı qytaılyqtardyń da batys mýzyka ındýstrııasyna kiretin ýaqyty jetkenin kórsetedi me degen suraq tóńireginde pikirtalastar órbitip júr.
"Halyqaralyq sarapshylarǵa áser etý óte qıyn. Bul tarıhı qalyptasqan jaǵdaı", deıdi mýzyka ındýstrııasyndaǵy Mıdııa medıa-konsaltıngtik fırma sarapshysy Mark Mallıgan. Onyń aıtýynsha, bul mýzyka aǵyny halyqaralyq ártisterge jol ashty. Tipti, keıbir aǵylshyn tilinde án salatyn shved mýzykanttaryna da sáttilik ákeldi. Biraq onyń ekinshi jaǵy da bar.
"Bul amerıkalyq stılge uqsaıdy", dep qosty ol. Al Chjannyń kóptegen ánderi ballada, ıaǵnı emosııalyq qoıylymdarǵa kóptep keledi.
Qytaıdaǵy EMI halyqaralyq kompanııanyń vıse-prezıdenti Djoanna Hýan ár ánshi óziniń erekshe qasıetterimen tanylýy kerek dep esepteıtinin aıtypty. "Batys juldyzdarynan kóshirip alý mindet emes", deıdi ol. Onyń aıtýynsha, Azııanyń dybys jazý kompanııalary halyqaralyq naryqqa shyǵýǵa talaı ret talpynǵan, aǵylshyn tilinde albomdar da shyǵarǵan. Biraq onyń tıimdiligi az bolypty. Ol úshin Djoanna erekshe mádenı elementterdi mýzykaǵa qosý kerek dep esepteıdi. Mysal retinde maman úsh qyzdan turatyn Babymetal japon trıosyn keltirgen. "Bul top ózderiniń mýzyka naryǵyna arnap án jazsa da, batys aýdıtorııasy olardy jaqsy qabyldady", - deıdi ol.
Osy rette mýzykalyq ındýstrııa ınsaıderleri Chjanǵa dál qazir durys strategııa tańdaý kerek dep otyr. "Qytaı ánshileri batys aýdıtorııasyn baǵyndyrýy úshin telearnalarǵa shyǵyp, zamanaýı múmkindikterdi paıdalanyp, ınternet qosymshalardy da qoldanǵany jón", deıdi Mallıgan. Al Hýan Qytaı tehnologııasynyń damý múmkindikterin eskere otyryp, kóńil kóterý salasy men bolashaq fılmderge án jazý da tanymaldylyqqa jol ashady dep esepteıdi. Bir aıta keterligi, Chjan The Great Wall blokbasteriniń jarnama ánin oryndaıdy eken.
Osy máselege qatysty pikir bildirgen kóptegen sarapshylar Qytaıda shyǵarylatyn tehnologııalarǵa mindetti túrde sol eldiń ánshileriniń trekterin engizý kerek dep esepteıdi. Al Djoanna Hýan "Sońǵy júz jylda qytaı tilinde án salatyn ánshilerde álemdik mýzyka naryǵyna shyǵýǵa múmkindikter bolǵan joq", dep otyr.