Eýrazııalyq ekonomıkalyq komıssııanyń (EEK) Alqa otyrysynda Eýrazııalyq ekonomıkalyq odaqqa (EAEO) múshe memleketterdiń jumyskerlerin zeınetaqymen qamtamasyz etý týraly shart jobasy maquldandy, dep habarlaıdy Strategy2050.kz.
Qujattyń maqsaty zeınetaqynyń qalyptastyrylýy men eksporty kezinde zeınetaqymen qamtamasyz etý salasyndaǵy teń quqyqtardy qamtamasyz etý, múshe memleketterde jumyskerlerdiń zeınetkerlik quqyqtaryn qorǵaý, sondaı-aq Odaq boıynsha áriptester arasyndaǵy zeınetaqymen qamtamasyz etý salasyndaǵy yntymaqtastyqty damytý bolyp tabylady, dep habarlady Komıssııa.
«Shart jobasy EAEO memleketterinde alynǵan eńbek ótilin esepke alýdy kózdeıdi. Mysaly, Qyrǵyzstannyń azamaty Belarýste bes jyl jumys istese, osy kezeń jalpy eńbek ótiline esepke alynatynyna senimdi bola alady», - delingen habarlamada.
EEK ekonomıka jáne qarjylyq saıasat jónindegi alqa múshesi (mınıstr) Tımýr Súleımenov atap ótkendeı, EAEO týraly shartta Odaq elderiniń azamattary úshin barlyq negizgi quqyqtar men jeńildikter eskerilgen, alaıda, EAEO memleketteriniń azamattary zeınetkerlik jasqa jetken jáne turatyn eline oralǵan kezde zeınetaqy alatyny týraly jazylǵan bólim joq. Komıssııa taraptardyń ýákiletti organdarymen birlesip jumys istep jatqan osy EAEO-ǵa múshe memleketterdiń jumyskerlerin zeınetaqymen qamtamasyz etý týraly shart osy quqyqtyq kemshilikti joıady.
Sharttyń kúshine enýi múshe memleketterdiń azamattaryn Odaq elderinde jumys isteý kezinde alǵan zeınetkerlik quqyqtaryn qalyptastyrý, saqtaý jáne iske asyrý quqyǵymen qamtamasyz etedi. Sondaı-aq qujat zeınetaqy eksporty jáne basqa múshe memlekette alynǵan jumys tájirıbesin esepke alý boıynsha máseleni sheshýdi kózdeıdi.
Shart jobasy oǵan qol qoıý úshin qajetti memleket ishindegi rásimderdi ótkizý úshin Odaq elderine jiberiletin bolady.
Anyqtama: Eýrazııalyq ekonomıkalyq odaqqa múshe memleketterdiń jumyskerlerin zeınetaqymen qamtamasyz etý týraly shart jobasy 2014 jylǵy 29 mamyrdaǵy Eýrazııalyq ekonomıkalyq odaq týraly sharttyń 98-babynyń 3-tarmaǵyna sáıkes ázirlengen.
Shart jobasyn ázirleý kezinde EEK jáne múshe memleketter Komıssııa Keńesiniń 2014 jylǵy 12 qarashadaǵy № 103 sheshimimen maquldanǵan Zeınetaqymen qamtamasyz etý salasyndaǵy yntymaqtastyq týraly halyqaralyq shart tujyrymdamasyn basshylyqqa alǵan.