Qostanaıdyń «Tobyl» fýtbol komandasy satylymǵa qoıyldy. Buǵan nıet bildirgender jalpy somany bir jyldan úsh jylǵa deıin bólip tóleı alady, dep habarlady vesti.kz.
«Alǵashqy eki kelissóz sátsiz aıaqtalǵandyqtan komıssııa bul iske jeńildikter engizýdi jón kórdi. Endi satyp alýshy jalpy somany bir jyl men úsh jyldyń arasyndaǵy merzimde tóleı alady. Al klýbtyń quny – 25 mıllıon teńge», – dedi Qostanaı oblysy qarjy basqarmasy tóraǵasynyń orynbasary Alma Júsipova.
Aıta keteıik, «Tobyldy» satý jónindegi sońǵy ári úshinshi aýksıon 20 jeltoqsanda ótýi tıis bolatyn, biraq 29 jeltoqsanǵa shegerildi. Al zań boıynsha úshinshi rette saýda jumystary aıaqtalmasa uıym resmı túrde jabylady.