Tanymal ádebıettanýshy-folklorıst, fılologııa ǵylymdarynyń doktory Edige Dáriǵululy Tursynov ómirden ótti. Bul týraly mádenıettanýshy Zıra Naýryzbaeva Facebook-taǵy paraqshasynda habarlady.
Mádenıettanýshy marqumnyń týǵan-týystaryna, jaqyndaryna jáne shákirtterine kóńil aıta otyryp, ony bylaı dep eske alady: «Biz anda-sanda kezdese qalǵanymyzda ol kisige ózin qatty qurmetteıtinimdi, onyń shyǵarmashylyǵyn joǵary baǵalaıtynymdy bildiretinmin. Biraq, birde-bir ret ony Uly adam dep sanaıtynymdy, men jáne meniń qatarlastarym ony ustaz tutatynyn, onyń kitaptaryn qoldan-qolǵa alyp oqyǵanymyzdy aıtyp úlgermegen sekildimin».
Marqummen qoshtasý rásimi 26 jeltoqsan kúni 10.00-de Almatydaǵy Ulttyq kitaphanada ótedi.
Edige Dáriǵululy Tursynov 1942 jyly 10 shildede Almaty qalasynda týǵan.
1964 jyly QazPI-di (qazirgi QazUPÝ) bitirgen.
1964-1966 jyldary Aqmola memlekettik medısına ınstıtýtynda (qazirgi Astana memlekettik medısına akademııasynda) oqytýshy bolǵan. Qazaqstan ǵylym akademııasynyń Ádebıet jáne óner ınstıtýtynda kishi ǵylymı qyzmetker bolǵan.
1994 jyldan «Aı» jýrnalynyń ádebı qyzmetkeri bolyp jumys istedi.