Astanada elimizdegi eń iri týberkýlezge qarsy dıspanser ashyldy, dep habarlady Elorda ákimdiginiń baspasóz qyzmeti.
Búgin elorda ákimi Áset Isekeshevke Astana qalasynyń týberkýlezge qarsy jańa dıspanseri tanystyryldy. Iri medısınalyq mekeme Jeleznodorojnyı kentinde qyrqynshy stansııaǵa jaqyn ornalasqan jáne 9 bloktan turady. Qurylysy 2008 jyly bastalǵan nysan bıyl tapsyrylyp otyr.
«Zamanaýı keshenge ıe bolý bizdiń armanymyz bolatyn. Túrli korpýstarda 4-ten 6 qabatqa deıin bar. Biraq eń bastysy - bul bir jáne eki oryndyq palatalar jáne olar barlyq sanıtarlyq normalarǵa jaýap beredi», - dep atap kórsetti «Astana q. Týberkýlezge qarsy dıspanseri» MM bas dárigeri Raýza Júsipova.
Jańa keshen tórt emdeý korpýsynan turady. Aýrýhana zamanaýı qural-jabdyqtarmen jaraqtalǵan. Dárigerlerdiń aıtýynsha, taǵy bir artyqshylyq - 12 tósek orynǵa eseptelgen reanımasııalyq bólimshe, bul elimizde jumys isteıtin dıspanserlerdiń ishindegi eń úlken bólimshe sanalady. Keshen 500 naýqasty qabyldaı alady, olarǵa 1000 úzdik maman qyzmet kórsetedi.
Atap óterligi, statıstıkaǵa sáıkes, Astanada týberkýlezben aýyratyndar sany tórt ese azaıǵan. 2008 jyly 218 naýqas bolsa, búgingi kúni naýqastar sany - 58 adam.