Fransııalyq teńizshi Tomas Kovıl jer sharyn trımaranmen bir ózi toqtamaı júzip ótýden dúnıejúzilik rekord ornatty, dep habarlaıdy Habar24.
48 jastaǵy saıahatshy álemdi 49 kún, úsh saǵatta aınalyp shyqqan. Osylaısha 2008 jyly jerlesi Fransýa Joıonom jasaǵan rekordty jańartty. Onyń kórsetkishi 57 kún bolatyn. Jańa rekordshy bul kórsetkishke besinshi múmkindiginde qol jetkizip otyr. Aıtýynsha, baryn salyp, toqtamaı júzý úshin táýligine 3 saǵat qana uıyqtap, fızıkalyq múmkindigin sarqa paıdalanǵan.
"Qaıyqty basqarý qıyn boldy. Bir ǵana qatelik jiberseń qaza tabýyń múmkin. Bul eshqandaı qorǵanyshsyz taýǵa órmelegenmen birdeı. Biraq eń keremeti júzip kele jatqanda kók aspan men teńizdiń ortasynda ózińdi ushyp kele jatqandaı sezinesiń," - deıdi saıahatshy Tomas Kovıl.