О́tken jyldyń kúzinde erkin júzýden Rıo Paralımpııa oıyndarynyń altyn júldesin taqqan Zúlfııa Ǵabıdýllınany jambyl jurty áýejaıdan qushaq jaıa qarsy alǵanda, oblys ákimi Kárim Kókirekbaev jeńimpazdy quttyqtaı turyp, aldaǵy ýaqytta Taraz qalasynan záýlim úı salyp berýge ýáde bergen bolatyn.
Mine, «Ýáde – Qudaı aty» degendi aımaq basshysy jadyna jaqsy túıse kerek, chempıonnyń qonys toıyn taýyq jylyna qaldyrmastan, týra 31 jeltoqsan kúni jańa úıdiń kiltin tabys etti. Záýlim úı «Taraz Arena» sport saraıyna jaqyn mańnan oryn tepti. Bul, árıne, Zúlfııa úshin óte yńǵaıly. Kún saıyn jaqyn jerdegi sport saraıyna qatynap, júzýmen erkin aınalysýyna múmkindik mol. Bes bólmeli úı «Bınom» JShS demeýshiligimen úsh aı ishinde turǵyzylypty. Bas-aıaǵy 20 mıllıon teńge jumsalǵan bul úıde arnaıy jattyǵý zaly da, pandýsy da bar. Al «Qazaqstan Halyq Banki» Jambyl oblystyq fılıalynyń dırektory Nurlybek Seıdahmet syılaǵan 3 mıllıon teńgege úıge qajetti jıhazdar satyp alyndy.
Árıne, Zúlfııa Ǵabıdýllınanyń qýanyshynda shek joq. Buǵan deıin kópqabatty úıde turyp kelgen chempıon baspaldaqtardan túsip-shyǵý óte qıyn bolǵanyn aıtady.
– «Taraz-Arenaǵa» jattyǵýǵa kelgen saıyn osy mańda jeke úıim bolsa dep armandaýshy edim. Mine, sol armanyma jetip otyrmyn. Sol úshin sport salasyna erekshe kóńil bólip júrgen Elbasyna, oblys ákimine aıtar alǵysym zor. Men de elimniń abyroıyn asqaqtatý úshin barymdy salamyn, – dep Zúlfııa aǵynan jaryldy.
Oralhan DÁÝIT,
«Egemen Qazaqstan»
Jambyl oblysy