Qoǵamdyq baqylaý – ashyqtyq kepili

Parlament  

«Egemen Qazaqstannyń» arnaýly beti

Parlament sessııasynyń ashy­lýynda sóılegen sózinde Elbasy Nursultan Nazarbaev besinshi sessııa barysynda Parlament al­dynda turǵan zań shyǵar­ma­shy­lyq mindettiń tórt blogyn atap kórsetti. Solardyń biri – quqyq qorǵaý organdaryn reformalaý jóninde birqatar naqty talaptar qoıdy. Qylmystyq atqarý júıe­si, qujat resimdeý ishki ister or­gandary quzyrynan alynyp, Ádilet mınıstrligine berilgeni belgili. О́kinishke qaraı, olar bul jumysty dóńgeletip alyp kete almady. Osy rette jaǵ­daıdy batystyq standarttarǵa saı beıimdeý ońaı sharýa emes ekendigin oryndy atap ketken jón. Keńes­tik dáýirden jyldar boıy qa­lyptasqan daǵdylar buǵan múm­kinshilik bere de bermeıdi. Árı­ne, onyń sheshimi bar, biraq oǵan qomaqty qarjy qajet. Sot júıesin reformalaý má­se­lesi de ótkir kúıinde qalyp otyr. Qazirgi kezde sot júıesine qoǵamdyq baqylaý jetispeıdi. Olar óz zańdaryn qabyldap al­ǵanymen, kóptegen kemshilikterge jol berip otyr. Joǵarǵy Sottyń alty birdeı sýdıasynyń ústinen qozǵalǵan qylmystyq is osyndaı kemshilikterdiń saldaryn kórset­se kerek. О́tken jyldyń ózinde ár túrli deńgeıdegi 11 sýdıa zań­dy burmalaǵany, para alǵany jáne ózge de qylmystary úshin ja­zalandy. Meniń paıymymsha, sýdıalyq kadrlardy iriktegen kezde jarııalylyq qajet. Halyq taǵaıyndalatyn sýdıalar tý­raly óz pikirlerin aıtsa, sonda ǵana durys tańdaý jasalady. Sot júıesiniń jumysy aza­mattyq qoǵamǵa ashyq bolǵany jón. Qarap otyrsaq, quqyq qorǵaý organdarynyń uıymdasqan qyl­­mys­pen kúresýge barlyq múm­kinshilikteri bar. «Qorǵas» kedeni tájirıbesinen quqyq qor­ǵaý or­gan­darynyń qylmyspen baı­la­nysy bolǵanyn kóremiz. Osy másele Elbasynyń tikeleı baqy­laýynda. Osy jerde kimniń kiná­li ekendigi ashyq aıtylyp, sol adamdar jazasyn tartýy tıis. Eger olar jazasyn almaı ketse, onda buǵan deıin qolǵa alynǵan sharalardyń barlyǵy da túkke turǵysyz bolyp qa­lady. Elbasy óz sózinde jem­qor­lyqqa qarsy kúresti keńeıtý kerek degendi atap aıtty. Osy oraıda nazar aýdaratyn nárse, jemqorlyqpen kúresti halyq­ara­lyq standarttarǵa sáıkes júzege asyrǵan jón. Memlekettik qyz­metker jaýapkershiligin arttyrý – ýaqyt talaby. Elbasy sáýir aıynda bolǵan Úkimet jınaly­syn­da da osyny atap kórsetken-tin. Sodan beri alty aı ótse de oblystarda, aýdandarda joǵary laýazym ıeleri paramen ustalyp jatyr. Biraq óz oryntaǵyn tastap ketken eshbir basshyny kórmeısiz. Elbasy qyzmetinen ket demegenshe otyra berýi tıis pe eken. Sondyqtan da bul normany zańǵa kirgizip, naqty sharalar qoldanǵan utymdy. Oralbaı ÁBDIKÁRIMOV, senator.