Ońtústik Qazaqstan oblysynyń ákimi Janseıit Túımebaev óńirdegi kınorejısserlarymen men anımasııa salasy mamandarymen kezdesip, «Erlik» tolyqmetrajdy fılminiń premerasyna qatysty, dep jazady OQO ákiminiń baspasóz qyzmeti.
Júzdesýde Shymkentte kıno men anımasııa salasynyń damytý joldary talqylanyp, aldaǵy josparlary aıtyldy.
Aıta keteıik, elimizde kıno ındýstrııasy boıynsha Ońtústik Qazaqstan ekinshi orynda bolsa, anımasııalyq fılmder túsirýden kósh basynda.
Bıyl qyrkúıek aıynda Túrkistan qalasynda Túrki áleminiń «Altyn saqa» anımasııalyq fılminiń festıvali ótedi. Atalǵan festıvalde anımatorlar túrki álemine ortaq ázilderimen tanylǵan Qoja Nasyrdyń obrazy usynylady.
Búginde oblystaǵy jeke kınostýdııalardyń 40-tan asa kıno týyndysy men 51 anımasııalyq fılmi kórermenge jol tartqan.
Shyǵarmashylyq ókilderimen bolǵan otyrysta sóz bastaǵan óńir basshysy sońǵy jyldary elimizde kınoǵa jáne onyń sapasyna jaqsy kóńil bólinip kele jatqanyn aıtty.
«Shymkent qalasynda kıno jáne anımasııa salasy qarqyndy damyp keledi. Osy baǵyttaǵy jumystardy jandandyrý maqsatynda bıyl qomaqty qarjy bólinýde. Sapaly ári tárbıelik maǵynasy joǵary ssenarıı men kásibı rejısser sapaly fılmniń kepili. Sondyqtan biz bilikti kadrlar daıyndaý jumystaryn qolǵa alýymyz qajet. Sonymen qatar, ońtústiktegi kıno stýdııalardy biriktirip, ortaq qundy dúnıe jasap shyǵarýdy usynamyn. Bul qazaq kıno ındýstrııasynyń damýyna septigin tıgizip, respýblıka kóleminde ońtústiktiń atyn shyǵarýǵa, halyqaralyq deńgeıde Qazaqstandy tanytýǵa múmkindik beredi»,-dedi ákim.
Jıynda kıno salasynyń úzdikteri de óz oılaryn ortaǵa saldy. Búginde elimizde otandyq kınony damytýǵa memleketten qoldaýlar kórsetilip jatqanyn aıtty. Túımebaevtyń óńirde osy salany damytýdy qolǵa alyp, kınorejısserlarymen kezdesip otyrǵan alǵashqy ákim ekenin jetkizdi.
«Sizben ótken kezdesý shyǵarmashylyq ujym jumysyna, jańa ıdeıalardyń týýyna serpin beredi. Bizdiń problemalarymyzben tanysyp, qazaq kıno ındýstrııasynyń damýy jaıynda aıtqan oı-pikirińiz biz úshin mańyzdy»,- dedi «Saq» kınostýdııasynyń dırektory, rejısser Nýrıddın Patteev.
Kezdesý sońynda «Shymkent Plaza» oıyn-saýyq saýda ortalyǵynyń kınozalynda oblys ákimdiginiń tapsyrysymen túsirilgen «Erlik» tolyqmetrajdy kórkem fılminiń tusaýkeseri ótti. Batyrhan Dáýrenbekov ssenarıi boıynsha rejısser Nýrıddın Patteevtiń túsirgen fılm jastardyń patrıottyq sezimin tereńdetýdi maqsat etedi.