Memleket tarapynan qabyldanyp jatqan keshendi sharalar nátıjesinde 2001-2015 jyldar aralyǵynda tabystary eń tómengi kúnkóris mólsherinen az turǵyndardyń úlesi 46,7%-dan 2,7%-ǵa deıin tómendedi. Bul kórsetkish qazaqstandyqtardyń ómir súrý sapasynyń jáne kedeılik deńgeıiniń azaıǵanynyń dáleli, dep habarlady primeminister.kz.
2002 jyly ártúrli obektıvti sebeptermen óziniń tirshilik áreketterinde jaǵdaı jasaýda qıyndyqtardy bastan keshken az qamtylǵan otbasylarǵa ataýly áleýmettik kómek (budan ári-AÁK) qarastyratyn «Memlekettik ataýly áleýmettik kómek týraly» QR zańy qabyldanǵan bolatyn.
Ataýly áleýmettik kómek alýshylardyń aıtarlyqtaı úlesin balalar quraıtyny eskerilip, «Balaly otbasylarǵa beriletin memlekettik járdemaqylar týraly» QR zańyna sáıkes, 2006 jyldyń 1 qańtarynan 18 jasqa deıingi balalarǵa aı saıynǵy memlekettik járdemaqy engizildi. Nátıjesinde AÁK alýshylardyń sany 30,9 ese azaıdy (2002 jyly 1,18 mln adamnan 2015 jyly 38,2 myń adamǵa deıin).
Sonymen qatar, az qamtylǵan azamattardy qoldaý maqsatynda, 1997 jyldan beri turǵyn úıdi ustaý, kommýnaldyq qyzmet tólemderi osy maqsattarǵa ketetin shekti shyǵyndardan artqan otbasylary úshin turǵyn úı kómegi engizildi. Turǵyn úı kómeginiń mólsheri jáne tártibi jergilikti ókildi organdarmen belgilenedi.
Sonymen, kedeılikpen kúresý boıynsha tıisti sharalardyń qabyldanýy, negizgi makroekonomıkalyq kórsetkishterdiń turaqty ósýi, jumyspen qamtýdyń jáne halyq tabysynyń ósýi kedeılik deńgeıiniń aıtarlyqtaı qysqarýyna alyp keldi.