Aýyl halqy úshin nesıe kólemin 16 mıllıon teńgege deıin kóbeıtý qarastyrylǵan. Bul týraly QR Premer-Mınıstri B.Saǵyntaevtyń tóraǵalyǵymen ótken QR Úkimetiniń kezekti otyrysynda Densaýlyq saqtaý jáne áleýmettik damý mınıstri Tamara Dúısenova málimdedi.
Mınıstrdiń aıtýynsha, nesıe 7 jylǵa deıingi merzimge, jyldyq salym kólemi 6% deńgeıde saqtala otyryp berilýge tıis. Nesıeniń qoljetimdiligin keńeıtýge baǵyttalǵan taǵy bir shara – 1,5 mıllıon teńge somasyna deıin kepilsiz nesıe berý.
Jumyspen nátıjeli qamtýdy jáne elimizde jappaı kásipkerlikti damytý baǵdarlamasynyń jobasyna oraı, ekinshi baǵyt boıynsha aýyldyq jáne qalalyq jerlerde shaǵyn kásipkerlikti damytý úshin halyqty yntylandyrýǵa jaǵdaı jasalady.
Aýyldyq jerler úshin basty mindet – ózin-ózi jumyspen qamtyǵan jáne jumyssyz azamattar úshin nesıeniń qoljetimdiligin qamtamasyz etý. Bul olardyń óz isin ashýyna nemese keńeıtýine, kooperatıvter qurýǵa, ne bolmasa kásipkerlikke qajetti ınfraqurylymdy jaqsartýǵa múmkindik beredi.
Aıta ketý kerek, aýyldyq jerler men shaǵyn qalalardaǵy shaǵyn nesıelendirýdi aýyl sharýashylyǵyn qarjylaı qoldaý qory arqyly, sonyń ishinde shaǵyn nesıeleý uıymdaryn tartý arqyly júzege asyrý josparlanǵan. Al qalalarda ol ekinshi deńgeıli bankter men shaǵyn nesıeleý uıymdary arqyly birdeı talaptar boıynsha júrgiziledi.
Arnur ASQAROV
«Egemen Qazaqstan