Keshe Aqtóbege Qazaqstan Respýblıkasy Premer-Mınıstriniń birinshi orynbasary Asqar Mamın bir kúndik jumys saparymen keldi. Delegasııa quramynda mınıstrlikterdiń, ulttyq holdıngter men kompanııalardyń basshylary boldy. Oblys ákimi Berdibek Saparbaevtyń jol bastaýymen resmı delegasııa «Aqtóbe rels arqalyq zaýyty» JShS-ne at basyn tiredi.
Bul kásiporyn ındýstrııalandyrý kartasyna engen birden-bir iri joba bolyp tabylady. О́ndiriste shapshań jyldamdyqtaǵy qozǵalys jelisi úshin relster shyǵarýǵa múmkindik beretin ınnovasııalyq tehnologııa qoldanylady. TMD elderi arasynda munda birinshi ret 120 metrlik rels shyǵarý ıgeriletin bolady. Jyl basynan beri zaýyt 6,1 mıllıard teńgeniń 32,7 myń tonna rels ónimderin óndirdi. Olar kásiporynnyń óndiristik prosesimen tanysty. Seriktestik dırektory Andreı Kýzmın zaýyttyń jartylaı shıkizat – som temirdiń peshte qyzyl shoqtaı balqytylyp, daıyn rels shyqqanǵa deıingi prosesin túsindirip ótti. Zaýyt jumysymen tanysý kezinde oǵan óńirde ındýstrııalyq-ınnovasııalyq memlekettik baǵdarlamanyń júzege asyrylý barysy týraly baıandaldy. 2010-2015 jyldary jáne bıylǵy jyldyń basynan beri 523 mıllıard teńge turatyn 83 joba júzege asyrylyp, 7,8 myń jumys orny ashylǵany málim etildi.
A.Mamın bastaǵan top zaýyttyń zerthanasynda bolyp, relsterdiń tózimdiligi, sapasy jáne basqa ólshemderi boıynsha halyqaralyq standarttarǵa tolyq jaýap beretinine kóz jetkizdi. Mamandar zerthanadaǵy biregeı qondyrǵylardyń relstiń sapaly shyǵarylýyna alǵyshart jasaıtynyn jetkizdi. Ár qondyrǵyny jete túsindirip, biregeı ónim shyǵarýdyń týra osy zerthanada túıindeletinin baıandady.
Jalpy, zaýyt jylyna 430 myń tonna prokat, onyń ishinde 200 myń tonna rels jáne 230 myń tonna iri sortty prokat ónimderin shyǵara alady. Jobanyń quny – 55 mıllıard teńge. Indýstrııalandyrý kartasy baǵdarlamasyna sáıkes jobanyń ınfraqurylymdyq jelilerimen jaraqtandyrylýyna oblystyq ákimdik qoldaý kórsetken. Iаǵnı, gaz, sý jáne kanalızasııa qubyrlaryn tartý, zaýyttyń temir jol arqyly ótetin avtojoly, 22 shaqyrym elektr jelisi osy baǵdarlama aıasynda júrgizilgen.
Seriktestik dırektory A.Kýzmınniń aıtýynsha, zaýyt kúnine 1 myń tonnaǵa deıin rels shyǵara alady. Rels shyǵarý bıyl ǵana bastalǵan. Endi 1,5 jylda kásiporyn tolyq qýatyna shyǵady. Qazir «Qazaqstan temir joly» AQ tapsyrysyn oryndaýda. Sondaı-aq, rels ónimderin eksportqa shyǵarý da qarastyrylýda. Bıyl birinshi ret О́zbekstanǵa óz ónimderin jóneltken zaýyt bolashaqta Belorýssııa, Grýzııa, Armenııa, Moldova jáne Tájikstan naryǵyna shyǵýǵa baǵyt ustaýda.
– Biz «R-60» relsin tolyq ıgerdik, endi kelesi jyly «R-65» relsin jáne qurylysqa qajetti birqatar temir qurylǵylaryn ıgerýdi qolǵa aldyq. Bizdiń kásiporyn shyǵarǵan rels jáne basqa temir ónimderi sapasy jaǵynan álemdik jáne halyqaralyq standarttarǵa saı keledi, keı ólshemder boıynsha artyp túsedi, – deıdi A.Kýzmın.
Premer-Mınıstrdiń birinshi orynbasary aıaldaǵan ekinshi kásiporyn «Turǵyn úı qurylysy» kombınaty boldy. Ústimizdegi jyldyń qańtar-qazan aılary aralyǵynda jalpy alańy 460,3 myń sharshy metr turǵyn úı paıdalanýǵa berildi. Turǵyn úı qurylysyn damytý úshin ústimizdegi jyly tamyz aıynda «Úı qurylysy kombınaty» JShS turǵyn úı qurylysy iske qosyldy. Munda da A.Mamın temir-beton panelderin jáne turǵyn úı qurylysy úshin qurylǵylar shyǵaratyn óndiristiń jumys prosesine nazar aýdaryp, ónim óndirý jaıymen jete tanysty.
Ol ozyq tehnologııa men daıyn ónimderdi kórip, kásiporynnyń keleshegi zor ekenine senim artty. Bul kásiporynnyń turǵyn úı qurylys ónimderi tolyqtaı ishki naryqqa shyǵarylady. Jobanyń quny 2,6 mıllıard teńgeni quraıdy. Kombınattyń jylyna 50 myń sharshy metr turǵyn úı qurylysy materıaldaryn shyǵarýǵa qýaty jetedi. Kásiporyn jumys qarqynyn birte-birte arttyryp keledi.
A.Mamın «Kaspıı plıýs» JShS-nde bolyp, taý-ken jáne óndirý óndirisi úshin túrli bekitkish shyǵaratyn kásiporynnyń tynys-tirshiligimen tanysty. Jyl basynan beri seriktestikte 20 myń dana bekitkish óndirilgen. Jalpy, bıylǵy on aıda óńirdiń ónerkásip ónimderiniń kólemi 959,7 mıllıard teńge qurady.
Sodan keıin Premer-Mınıstrdiń birinishi orynbasary A.Mamın bastaǵan delegasııa jańa kólik-logıstıkalyq ortalyǵynda jáne «Sheber» qurylys gıpermarketinde boldy.
Satybaldy SÁÝIRBAI,
«Egemen Qazaqstan»
Aqtóbe oblysy