Qazaqstan Respýblıkasynyń Tuńǵysh Prezıdenti kúni qarsańynda Petropavldan alys ornalasqan Zagradovka eldi mekeninde sáýletti sport kesheni paıdalanýǵa berildi.
Buǵan deıin balalar qysqy sport túrlerinen jattyǵýlardy ashyq aspan astynda ótkizip kelse, endi 2 myń sharshy aýmaqty alyp jatqan záýlim ǵımaratqa qaraı kún saıyn asyǵatyn bolady. «Prometeı-Agro» JShS dırektory Iýrıı Sholdyń aıtýynsha, áleýmettik nysan seriktestiktiń jeke qarajatynan turǵyzylyp, aýyldastaryna úlken syı ázirlegen.
Sport kesheniniń ashylý saltanatyna qatysqan oblys ákimi Erik Sultanov Zagradovka aýyldyq okrýginiń hokkeı komandasyna sport jabdyqtaryn tartý etti.
– Osydan eki jyl buryn oblys ortalyǵynda qurylǵan «Qulager» hokkeı komandasy bıyl elimizdiń kýbogyn jeńip aldy. Birinshi lıgada óner kórsetetin «Qyzyljar» fýtbol komandasy el birinshiliginde qola júldeni ıelendi. Qazir óńir turǵyndarynyń úshten biri sportpen shuǵyldanyp, salamatty ómir saltyn ustanady. Sońǵy eki jylda 100 hokkeı korty, 250 fýtbol alańy iske qosyldy, – dedi Erik Hamzauly quttyqtaý sózinde.
Eresekter men balalar munda qysta hokkeı, jazda fýtbol, voleıbol, basketbol oınaıdy. Konkı, short-trek, mánerlep syrǵanaý, ústel tennısi sport túrlerimen aınalysýǵa da barlyq jaǵdaı jasalǵan. Túrli merekelik sharalar da ótkizýge bolady. Nysannyń ashylýyna oraı birneshe aýdan hokkeıshileriniń qatysýymen shaıbaly hokkeıden týrnır uıymdastyryldy.
Oblys ákimi «Uly Dala eli – Táýelsizdiktiń 25 negizi» atty aksııa aıasynda Korneevka gımnazııasynda ótken sharaǵa qatysyp, ujymǵa kompıýter syılady.
Ulttyq kıim kıgen oqýshylar qonaqtardy tórt tilde qarsy alyp, qurmet kórsetti. Mundaı oqý oryndary elimizde jeteý ǵana. 2009 jyldan beri «Mektepter – bolashaq áriptester» baǵdarlamasy qoldanylady. Muǵalimderdiń eńbekaqysynan basqa qarajattar Germanııa men Avstrııa esebinen óteledi. Gımnazııa dırektory Ekaterına Dýnına 255 oqýshynyń bilim alatynyn, 20 kabınettiń jumys isteıtinin, barlyq synyptarǵa ınteraktıvti taqtalar ornatylǵanyn jetkizdi. 85 oryndy ınternatta 14 eldi mekenniń oqýshylary turady. Ashana, naýbaıhana bar.
Sport zaldyń kúrdeli jóndeýine nemis kásipkerleri 10 mıllıon teńge bólgen eken. Meıbýkan godzıýrıý karate boıynsha jattyqtyrýshy Oleg Antankın bıyl osynda Qazaqstan birinshiligi ótkenin, 9 oblystan qatysqan 160 jas balǵyndar arasynda gımnazııa 3-oryndy jeńip alǵanyn aıtty.
О́mir ESQALI,
«Egemen Qazaqstan»
Soltústik Qazaqstan oblysy,
Esil aýdany
Sýretti túsirgen
Talǵat TÁNIBAEV