Ońtústik Qazaqstan oblysynyń ákimi Janseıit Túımebaev aımaqqa arnaıy jumys saparymen kelgen Túrkııa Respýblıkasynyń dárigerlerden jasaqtalǵan bir top delegasııasymen kezdesti, dep habarlady oblys ákimdiginiń baspasóz qyzmeti.
Erte jastaǵy balalarǵa kórsetiletin medısınalyq kómektiń sapasyn jaqsartý, náresteler ólim-jitimin tómendetý maqsatyndaǵy tájirıbesimen bólisýge kelgen jumysshy topqa Túrkııa Respýblıkasy Úkimeti janyndaǵy yntymaqtastyq jáne úılestirý jónindegi Túrik agenttigi (TIKA) uıytqy bolyp, ony oqý bóliminiń bastyǵy Mýstafa Hasım bastap kelip otyr.
Kezdesýde taraptar baýyrlas qos memlekettiń qarym-qatynasy men birlesken jobalar jaıyn sóz etip, búginnen bastalatyn sheberlik sabaǵynyń naqty mindetteri boıynsha áńgimelesti.
Atap aıtqanda, 2-4 jeltoqsan aralyǵynda Túrkııadan kelgen mamandar oblystaǵy balalar men bosanatyn áıelderge medısınalyq kómek berý qyzmetiniń dárigerlerine - neonatologtarǵa, oftalmologtarǵa, pedıatrlarǵa, akýsher mamandarǵa, neonataldyq meıirbıkelerge teorııalyq jáne praktıkalyq dárister ótip, biliktiligin joǵarylatý boıynsha arnaıy oqytý kýrsynan ótkizedi. Sheberlik sabaǵyna 30-ǵa jýyq maman qatysady dep josparlanýda.
Oblystyq balalar klınıkalyq aýrýhanasynyń halyqaralyq tehnologııalar ortalyǵynyń bazasynda ótetetin sharada jańa týǵan balalarda kezdesetin túrli shuǵyl jaǵdaılar (asfıksııa, tynys alý jetkiliksizdigi) kezinde tıimdi reanımasııalyq kómekti sapaly júrgize bilýge, naýqas jáne deni saý jańa týǵan balalarǵa mamandandyrylǵan kútim jasaýǵa, erte jastaǵy balalardaǵy kórýdiń buzylystaryn ýaqtyly anyqtaýǵa oqytý baǵdarlamalary josparlanǵan. Sonymen qatar, medısına qyzmetkerleri jańa týǵan balalarǵa reanımasııalyq kómek kórsetý boıynsha zamanaýı sımýlıasııalyq manekenderge tájirıbe jasap daǵdylanady.
Aıta ketý kerek, úsh kúndik dáris kezinde erekshe kózge túsip, arnaıy emtıhannan súrinbeı ótken birqatar medısına qyzmetkerlerine sertıfıkattar tabystalyp, olarǵa Túrkııada bilimin jetildirýge joldama berilmek.