Almatynyń «Qaırat» fýtbol klýby jartylaı qorǵaýshy Georgıı Jýkovpen aradaǵy kelisimshartty rásimdedi. Úsh eldiń azamattyǵy bar fýtbolshy reseılik «Ýraldan» aýysyp keldi, dep xabarlaıdy QazAqparat tilshisi.
«Qarsy alyńyz, «Qaırat» fýtbol klýbynyń jańa oıynshysy Georgıı Jýkov úsh jyldyq kelisimshartqa qol qoıdy. Qujatta fýtbolshynyń Qazaqstannyń ulttyq quramasy úshin oınaý sharty da qarastyrylǵan», - dep jazdy klýbtyń baqylaýshy keńesiniń tóraǵasy Qaırat Boranbaev.
Buǵan deıin 22 jastaǵy jartylaı qorǵaýshy reseılik «Ýral» klýbynda oınaǵan. Reseı chempıonatynta tórt matchqa qatysty. Alaıda klýb basshylyǵymen kelispeı, ketip qalǵan.
Aıta keteıik, Semeıdiń týmasy Jýkov bala kezinde Belgııaǵa kóship ketken. Sol jerde «Beersxota» men «Standard» klýbtarynda óner kórsetti. Al 2013 jyly elge oralyp, «Astana» klýbynda eki jyl oınady. 2015 jyly G.Jýkov Qazaqstannyń ulttyq quramasy sapynda eki joldastyq kezdesý ótkizdi. Alaıda birneshe ret birlesken oqý-jattyǵýlardan bas tartqan. Al belgııalyq buqaralyq aqparat quraldaryna bergen bir suxbatynda ol Reseı nemese Belgııa quramasy úshin oınaǵysy keletinin málimdegen.