Myń jyldyq tarıhy bar alyp Almatyny eki kún boıy jyrmen terbegen «Altyn dombyra» aıtysy márege jetti. Bas júlde – altyn dombyra, aıtystyń shyn júırigi, Syr súleıi Muhtar Nııazovqa buıyrdy!
Almaty qalasynyń ákimdigi men «Nur Otan» partııasynyń qoldaýymen El táýelsizdiginiń 25 jyldyǵyna arnalǵan bul aıtys aıtysker aqyndardyń bıylǵy basty dodasy. Eń aldymen, shırek ǵasyr ýaqytta jetken jetisitigimizge súıinip aıtqan, áli de olqy túsip jatqan jerlerimizge kúıinip aıtqan aqyndardyń aıshyqty sózderine qol soǵyp, qoshamet qylǵan jurttyń yqylasy týraly aıtýymyz kerek. Almatydaǵy eń úlken saraılardyń biri Respýblıka saraıynda qatarynan eki kún boıy ıne shanshar oryn bolǵan joq.
20 aqyn qatysqan aıtys úsh aınalym boldy. Ekinshi aınalymda Meıirbek Sultanhan,
О́mirjan Kópbosyn, Serikzat Dúısenǵazy, Muhtar Nııazov, Erkebulan Qaınazar, Qalıjan Bildashev, Aspanbek Shuǵataev, Bolatbek Orazbaev, Jansaıa Mýsına, Iran-Ǵaıyp Kúzembaev, Rústem Qaıyrtaı, Erjan Ámirov aıtysyp, odan Serikzat Dúısenǵazy, Jansaıa Mýsına, Bolatbek Orazbaev, Muhtar Nııazov syndy júırikter iriktelip shyqty. Úshinshi aınalymda osy tórt aqyn aıtysyp, nátıjede Bas júlde, "Altyn dombyra" – Muhtar Nııazovqa, (3 000000 teńge) 1 – oryn Bolatbek Orazbaevqa, (2 000 000 tg) 2 – oryn Jansaıa Mýsınaǵa, (1 000 000 tg) 3 - oryn Meıirbek Sultanhanǵa, (500 000 teńgeden) О́mirjan Kópbosynovqa, Iranǵaıyp Kúzembaevqa, Serikzat Dúızenǵazyǵa buıyrdy.
Aqyndardyń ónerin Qazaqstannyń halyq aqyny Qonysbaı Ábilov, fılologııa ǵylymdarynyń doktory Qoılybaı Asanov, «Daryn» syılyǵynyń laýreaty Muhamedjan Tazabek, QR eńbek sińirgen qaıratkeri Amanjol Áltaev, «Daryn» syılyǵynyń laýreaty Dáýletkereı Kápuly syndy tanymal aqyndardan jasaqtalǵan qazylar alqasy baǵalady. Aıtýly dodany aıtystyń aqylmany Júrsin Erman júrgizdi.
Ulttyq óner bolǵan soń da ulttyń bir minezin, bir bolmysyn kórsetpeı qalar ma, alamannyń júldesin tapsyrýǵa shyqqan Almaty qalasynyń ákimi Baýyrjan Baıbek aqyndarǵa rızalyǵyn aıta kelip, Bas báıgeniń júldesine taǵy 2 000 000 teńge, birinshi orynnyń júldesine 1 000 000 teńge ústeme qosatynyn habarlaǵanda kórermen qoshameti tipti de údeı tústi.
Aıta keteıik, "Altyn dombyra" aıtysy osymen V ret ótkizilip otyr. Muhtar Nııazov (2012 jyly) alǵashqy ıegeri bolǵan edi. 2013 jyly Jandarbek Bulǵaqov ıelense, 2014 jyly Balǵynbek Imashevtiń enshisine buıyrǵan bolatyn. Al 2015 jyly «Altyn dombyra» Aspanbek Shuǵataevqa buıyrǵan bolatyn. Bıyl mine, «Altyn dombyra» aınalyp Muhtardyń qolyna qaıta keldi. Almatydaǵy bul aıtys joǵary deńgeıde ótti deıdi baǵalaýshylar. Aqyndardyń, (Muhtar Nııazov):
...
Altyn dombyra jarqyldap arbasa da,
Jańylmaımyz adamdyq qalpymyzdan.
Esikten «altyn adam» tabylǵanda,
Jer, álem titirep ed dańqymyzdan.
Babalar birlik quryp turǵan shaqta,
Teń dúnıe teńseldi narqymyzdan.
Solardaı súrinbesek saltymyzdan,
Solardaı jańylmasaq antymyzdan.
Kebin bolyp kıilip altyn ózi,
Qabirge qýyp keler artymyzdan. – dep keletin jaýhardaı jyr shýmaqtary mereıli merekemizdi ulttyq ónerimizben ulyqtaǵan aıtýly kúnderdiń aspanynda osylaısha qalyqtap qala berdi.