Búgin Astanada ótken baspasóz máslıxatynda QR Din isteri jáne azamattyq qoǵam vıse-mınıstri Berik Aryn memlekettik qyzmetshilerdiń dinı ustanymyna qatysty túsinikteme berdi. Sondaı-aq ol "Memlekettik qyzmetshiler juma namazyna qatysa ala ma?" degen suraqqa jaýap berdi, dep xabarlaıdy QazAqparat.
"Memlekettik qyzmetshi áskerı adam sııaqty naqty bir mindetteri bar tulǵalar sanatyna jatady. Adam memlekettik qyzmetke kelgennen keıin tıisti mindetterdi óz moınyna alady. Bul degenimiz, jumys ýaqytynda ol ózine júktelgen mindetterdi oryndaýy tıis. Qyzmet ornynda óziniń dinı paıymdaryn ashyq bildirýge de ruqsat joq. Ondaı talaptar dinge ǵana emes, memlekettik qyzmetshiniń kıim-kıisine de qoıylady. Budan bólek, etıka degen másele bar. Memlekettik qyzmetker memlekettiń "bet-álpeti" bolǵannan keıin, ózin laıyqty ustap, tıisti erejelerdi saqtaýy qajet", - dep atap kórsetti B.Aryn.
Aıta keteıik, osydan bes jyl buryn qabyldanǵan «Dinı qyzmet jáne dinı birlestikter týraly» zańdy túsindirýge arnalǵan búgingi baspasóz máslıxatynda Berik Aryn destrýktıvti aǵym ókilderiniń ımamdarmen daýlasyp, meshitke kelýshilerdi qorqytyp jatqanyn jetkizdi. Osy oraıda ol dereý polısııaǵa xabarlasýǵa keńes berdi. Sebebi ondaı áreketter zańmen qýdalanady.