Qazaqstandyqtar jarııa etý jónindegi naýqan sheńberinde 7900 astam bank shottaryn ashty, dep habarlaıdy QR Ulttyq banktiń resmı saıty.
Jarııa etý jónindegi naýqannyń qoldanylý kezeńi ishinde 2014 jylǵy 1 qyrkúıek – 2016 jylǵy 30 qarasha aralyǵynda bankter 7917 bank shotyn ashyp, olarǵa shamamen 2 trln. 860 mlrd. teńge saldy. Bul týraly búgin QR Ulttyq Bankiniń Tóraǵasy Danııar Aqyshev Qazaqstan Respýblıkasy Úkimetiniń otyrysynda sóılegen sózinde habarlady.
D.Aqyshev 2016 jylǵy 1-30 qarasha aralyǵynda 2501 bank shotynyń ashylǵanyn, shamamen 652 mlrd. teńge salynǵanyn naqtylady. Bul rette 2 trln. 558 mlrd. teńgeden kem emes sheteldik valıýtada, basym túrde AQSh dollarymen jarııa etildi, bul jalpy jarııa etilgen aqsha somasynyń 89%-yn quraıdy.
«Jarııa etilgen aqshalaı qarajattyń jartysynan kóbi 56% bank shottaryna qolma- qol nysanda salyndy. Qolma-qol emes aýdarymdar arqyly 44% aýdaryldy, onyń ishinde 14%-y sheteldik bankterdegi shottardan aýdarymdar», – dedi D.Aqyshev.
Ol sondaı-aq aqshany jarııa etý maqsaty úshin shetelden Qazaqstan Respýblıkasyna aqsha negizinen Shveısarııadan, Reseıden, Sıngapýrdan, Ulybrıtanııadan, Lıhtenshteın Koroldiginen tústi dep tolyqtyrdy.
Sonymen qatar, qarjy retteýshisi basshysynyń aqparaty boıynsha arnaıy shotta qarajatty saqtaý boıynsha talaptyń kúshin joıýyna baılanysty, azamattar jarııa etý rásimderi aıaqtalǵannan keıin aqshany arnaıy shottardan qaıtadan ádettegi bank shottaryna aýdarýdy jón kóredi.
Jarııa etý kezeńi ishinde arnaıy shottardan basqa bank shottaryna aqshalaı qarajattyń 59%-y aýdaryldy. Bul rette, D.Aqyshev atap ótkendeı, jarııa etilgen aqsha negizinen Qazaqstannyń bankterinde ashylǵan bank shottaryna aýdarylady. Sheteldik bankterde ashylǵan shottarǵa jarııa etilgen aqshanyń 7%-yna jýyǵy aýdaryldy.
Ulttyq Banktiń Tóraǵasy 2016 jylǵy 1 tamyzdan bastap azamattyń qalaýy boıynsha salyq organdaryna deklarasııany ekinshi deńgeıdegi bankter arqyly berý múmkindigi iske asyrylatynyn habarlady. D.Aqyshev atap ótkendeı, búgingi kúni azamattardan osyndaı ótinishter túsken joq. Oblystar boıynsha aqparatqa qatysty aıtatyn bolsaq, ashylǵan shottarynyń sany jáne olarǵa salynǵan qarajat boıynsha Almaty, Astana qalalary, sondaı-aq Ońtústik Qazaqstan, Qaraǵandy oblystary alda keledi.