Otandyq kásipkerlerdiń tól merekesi — Indýstrııalandyrý kúnine oraı uıymdastyrylyp, Qazaqstan Respýblıkasynyń Prezıdenti Nursultan Nazarbaevtyń qatysýymen ótip jatqan Jalpyulttyq telekópir barysynda «Sapa kóshbasshysy», «Úzdik ındýstrııalyq joba» jáne «Úzdik ınnovasııalyq joba» atalymdarynyń jeńimpazdary anyqtaldy.
Sonymen qatar, dástúrli telekópir kezinde el óńirlerinen Indýstrııalandyrý kartasy jobalarynyń tusaýy kesildi. Nursultan Nazarbaev «Nurly jol» baǵdarlamasy aıasynda birqatar ındýstrııalyq jáne ınfraqurylymdyq jobalar óndirisin iske qosty.
Atyraýdaǵy iri munaı óńdeý zaýyty, Aqmola oblysynan «Avgýst-nan» kásiporny men Jambyl oblysynan «Qazfosfat» JShS basshylyǵy baılanys ornatty.
Elbasy ulttyq rýhy berik, saıası júıesi turaqty, ekonomıkalyq áleýeti myqty, básekege qabiletti, halyqaralyq bedeli zor qýatty memleket qura bilgenimizdi atap ótti. Qazaqstan búginde yntymaq uıasyna, dostyq pen kelisim panasyn saıalaǵysy keletin jandar úshin jeruıyq mekenine aınalyp otyr.
«Bul jobalar Táýelsizdiktiń 25 jyldyq mereıtoıynda kóńilimizdi kótere túsýde. Biz búgin ónim sapasy jóninen eń úzdik kásipkerlerdi marapattamaqpyz. Júzden júırik ozatyny anyq. Tarıhta alǵash ret óńdeýshi ónerkásip taý-ken salasynan ósim jaǵynan joǵary kórinýde. Sheteldik ınvestısııanyń jalpy kóleminde óńdeýshi kásiporyndar úlesi 2 eki esege ósti. Búginde jasalǵan ıgilikti isterdi keler urpaq áli alǵyspen eske alatyn bolady», – dep sózin jalǵastyrǵan Prezıdent qazaqstandyqtar ózimizde jasalǵan elektromobılderdi qoldansa, ekologııalyq ahýal jaqsara túser edi degendi keltirdi.
Elbasy álemdik bıznestiń Qazaqstanǵa senimi nyǵaıǵanyn atap ótti. «Búkilálemdik bank reıtınginiń bıznesti júrgizýdiń jeńildigi turǵysynda 190 eldiń arasynda 35-orynǵa kóterildik», – degen Nursultan Nazarbaev eksport máselesiniń esh ýaqytta ózektiligin joımaıtynyn taǵy bir márte eske salyp, daǵdarysqa qaramastan damý jolynan aınymaǵan barsha bıznes-qaýymdastyqqa alǵysyn bildirdi.
Qazaqstan Prezıdenti jas kásipkerlerdi talmaı eńbek etip, bıik belesterdi baǵyndyrýǵa yntalandyryp, asqaq ıdeıalar arqyly el tynys-tirshiligin gúldendirýge shaqyrdy.
Saltanat qorytyndysynda Nursultan Nazarbaev «Altyn sapa» arnaýly úsh syılyǵy men «Paryz» baıqaýynyń bas júldesin tapsyrdy.
«Úzdik ındýstrııalyq joba» atalymynda munaı-gaz kesheni qural-jabdyǵyn jáne qosalqy bólshekterin shyǵarý men olarǵa qyzmet kórsetýde baı tájirıbesi bar, qazirgi zamanǵy tehnologııalardy ıgergen «AtyraýMunaıMash» JShS quryltaıshysy Saǵat Túgelbaev Elbasy qolynan qundy syılyqty enshiledi.
«Úzdik ınnovasııalyq joba» atalymynda Ońtústik Qazaqstan oblysyndaǵy «HIMFARM» AQ top jaryp, júldeni kásiporyn dırektory Rýstam Baıǵarın aldy. «Hımfarm» AQ óndiristik qýaty jylyna 1,5 mıllıard tabletka, kapsýla jáne túıirshik shyǵarýǵa múmkindik beredi. Kompanııa ónimi Qyrǵyzstan, Tájikstan, Mońǵolııa, Túrkimenstan jáne Reseı naryqtaryna jiberilýde.
«Sapa kóshbasshysy» atalymynda «Qazaqstan elektrolız zaýyty» AQ úzdik kórindi. Bul syılyq ERG menedjerler keńesiniń tóraǵasy Aleksandr Mashkevıchke tapsyryldy. Osy oraıda bastapqy alıýmınıı óndirý jónindegi elektrolız zaýytyn 2007 jyly Elbasynyń ózi iske qosqanyn aıta ketken jón. Búginde kásiporynda 2,5 myńnan astam adam eńbek etedi. Zaýyttyń jobalyq qýaty jylyna 250 myń tonnaǵa jetip otyr.
«Paryz» bas júldesi «Aqsaıgazservıs» AQ prezıdenti Tilek Shektebaevke berildi. Kompanııa jyl saıyn áleýmettik baǵdarlamalardy júzege asyrýǵa 25 mln teńgege deıin qarjy bólip, bilim berý, mádenıet mekemelerine turaqty qoldaý kórsetip, muqtaj jandarǵa qol ushyn sozyp keledi.