Atyraýǵa jumys saparymen barǵan Qazaqstan Prezıdenti Nursultan Nazarbaev Qashaǵan ken ornynyń resmı ashylý sharasyna qatysty, dep habarlaıdy «QazAqparat».
Qashaǵan – álemdegi iri jáne elimizdegi tuńǵysh teńiz ken orny.
«2016 jyly 1 qarashada Qashaǵandaǵy munaı óndirý kólemi táýligine 75 myń barrelden asyp, kommersııalyq deńgeıge shyqty. Qazirgi ýaqytta munaı óndirý kólemin ulǵaıtý maqsatynda táýligine 180 myń barrel deńgeıin turaqtandyrý jumystary júrýde. Bıylǵy jyldyń sońyna deıin 1 mıllıon tonna munaı men 680 mıllıon tekshe metr gaz, 2017 jyly – 8,9 mln tonna munaı men 5,6 mlrd. tekshe metr gaz óndirý josparlanǵan. Odan keıingi jyldary munaı óndirisin 13 mıllıon tonnaǵa jáne gaz óndirisin 9 mlrd. tekshe metrge deıin kóbeıtý josparda bar», – dep baıandady Energetıka mınıstri Qanat Bozymbaev Memleket basshysyna.