«Ǵalymjannyń bul saparynyń maqsaty – elimizde ótkizilgeli jatqan halyqaralyq EKSPO kórmesin jurtshylyqqa nasıhattaý. Áýeli О́skemennen Semeıge jetip, odan ary Kereký qalasyna taban tirep, Ereımentaý arqyly Astanaǵa jetsek degen oıymyz bar», degen ol bir kólikpen joldasynyń artynan júrip kele jatqandyqtaryn, ózderimen birge bir dárigerdi ala shyqqandyqtaryn aıtty. Jáne bul saparǵa eshqandaı arnaıy mekemelerdiń qatysynsyz, óz erikterimen, týǵan-týys, joldas-joralarynyń kómegimen attanyp bara jatqandyqtaryn, «búgin mynda qonamyz», «erteń anda qonamyz» dep aldyn ala jospar qurmaǵandaryn da jetkizdi.
Osydan bir saǵat buryn habarlasqanymyzda Erkegúl Ǵalymjannyń 26 mamyr kúni Glýbokoe aýdanyndaǵy Gagarıno aýylyna qonyp, jolǵa shyqqanyn, bul kúni 70 shaqyrym júgirip ótkenin, búgin Bulaq aýylyna túnep, Semeıge 29 mamyr kúni jetýdi josparlap otyrǵandaryn tilge tıek etti.
«Túnde jol ústinde túnesek dep ózimizben birge shatyr ala shyqqanbyz. Biraq turǵyndar bizdiń kele jatqanymyzdy aldyn ala bilip, telefon shalyp, «bizdiń úıge qonyńdar» dep qonaqjaılylyq tanytyp jatyr. Mundaı keń peıil azamattarǵa alǵystan basqa aıtarymyz joq», deıdi Erkegúl.
Erkegúl Muqııatqyzy Ǵalymjannyń kúndelikti júgirý, tynyǵý tártibin de aıtyp berdi. Onyń aıtýynsha, Ǵalymjan tańerteń saǵat 06:00-de turyp, 06:30-ǵa deıin tańǵy asyn iship, saǵat 07:00-den júgirýdi bastap, bir saǵat júgirip, 10 mınýt tynyǵyp alady eken. Bir kúngi júgirý mejesi – 8 saǵat, júgirý uzaqtyǵy – 60-70 shaqyrym.
Ǵalymjan Toqtar buǵan deıin qaladaǵy halyqqa qyzmet kórsetý ortalyqtarynyń birinde jumys istegen. Jubaıy onyń qazirgi ýaqytta jumys istemeıtinin aıtty.
Qazir Astanaǵa jaıaý jol tartyp bara jatqan jigitti jolaı kútip alyp, as-sý usynyp, qudaıy qonaq etýge nıetti azamattar 87789262622 telefonyna habarlasýyna bolady.
Azamat QASYM, «Egemen Qazaqstan»
Sýret Ǵalymjan Toqtardyń jubaıy Erkegúl Muqııatqyzynan alyndy