...Stalınniń solaqaı saıasaty saldarynan nebir tektilerimiz qara jer qoınaýyna erte tústi. Asyldardyń ardaqty jarlary da taǵdyrdyń mehnatyn tartyp, órimdeı balalaryn ólimge óz qoldarymen attandyrǵanyna nazalandy. Buǵan qarsy shyǵar qaıran da joq edi-aý. Qazaq tarıhynda «Ejov qyrǵyny» degen atpen qalar soıqannyń ózi sanaǵa salmaq salady. Al ALJIR-degi qazaq qasiretin tilge tıek etýdiń ózi aýyr. Kórnekti aqyn Ǵalym Jaılybaıdyń «Qara oramal» atty poema-rekvıemi osy atalǵan qasiretterdi arqalaǵan shyǵarma.
Atalmysh týyndy jelisinde sahnalanǵan qoıylym jazyqsyz jala saldarynan jazalanǵan ana men týǵanynan jyraqtaǵan bala taǵdyryn kóz aldyńa alyp keledi. Nebir jan tózgisiz zorlyq-zombylyqtardy bastan ótkergen, aýyr eńbekke jegilgen qaıran analardyń ómiri janarǵa jas úıiredi.
Bir qaraǵanda, «Dúr silkinter dúnıeniń dúrmegi aýyr, Kúnde dabyr bul tirlik, kúnde daýyl. Alash jurty azaptyń araly ma – Qaraǵandy lageri, bul ne lager?..» – degen joldarmen bastalatyn poema-rekvıem sahnalaýǵa kelmeıtin, tili aýyr, ıirimi bólek dúnıe sekildi kórinedi. Alaıda, sahna maıtalmandarynyń tabandy eńbeginiń nátıjesinde ári oqýshylardyń talanty men izdenimpazdyǵynyń arqasynda oıdaǵydaı sahnalanyp, kórermenniń kóńilin tolqytty. Bul rette, qoıylymnyń sýretshisi Saıat Jumadil men dybys rejısseri Qarlyǵash Isaevanyń eńbegin de atap ótken jón.
Asyl SULTANǴAZY