– Fılmniń ıdeıasy marqum Meńtaı О́tepbergenovtiki. Bir kúni kınostýdııada kezdeskenimizde, kınomehanıkter týraly oıyn aıtty. Keıinnen onyń oıyn tarqatyp, ssenarıı jazyp shyqtym. Ssenarııdi kórgen sátten bastap, aýyryp júrgenine qaramastan, basty róldi somdaýǵa daıyndalyp, qýanyp júrdi. Amal neshik, fılmniń túsirilimge shyqqanyn kóre almaı ketti. Alaıda, onyń esimi tıtrǵa jazylady, – dedi rejısser Ermek Tursynov.
Fılm ekinshi dúnıejúzilik soǵys kezinde nemis qarııasynan syıǵa kınoapparat alǵan soldat týraly. Soǵystan oralǵan jaýynger úıiniń qańyrap bos turǵanyn kóredi, jaqyndary qaıtys bolǵan. Ol Germanııada qart nemisten syıǵa alǵan kınoproektormen kıno qoıady. Qaıǵysynan tez aıyǵýyna osy fılmder yqpal etedi. О́mirdi qaıta bastaýǵa qýat alady. Sóıtip, qartaıǵan shaǵyna deıin el aralap, kınoapparatpen eski fılmderdi kórsetip, kınematograftyń kómegimen álemdi ózgertýge bolady dep senedi.
«Kınomehanık» kınokartınasy Mádenıet jáne sport mınıstrliginiń tapsyrysy boıynsha túsirilgeli otyr. Kartınanyń prodıýseri Qanat Tórebaı ekinshi dúnıejúzilik soǵys sýretteletin epızodtar ótken jyldyń jeltoqsan aıynda Býdapeshte túsirilgenin aıtyp, túsirilgen 8 mınýttyq beınematerıaldy caraptaý keńesiniń múshelerine kórsetti.
– Soǵystan keıingi jyldardy sahnalaýǵa qajetti nysandardy tabý úshin Qazaqstannyń barlyq aımaǵyn sharlap shyqtyq. Aralaı kele, fılmdi Jarkent qalasy mańynda túsirýdi jón dep sheshtik. Bizdiń kartınamyz HH ǵasyrda kıno ónerin taratýshylarǵa baǵyshtalady, – dep túıindedi prodıýser.
Ermek Tursynovtyń bul fılminde basty rólderdi Murat Maqajanov jáne kartınanyń qoıýshy sýretshisi Qýat Tileýbaı somdaıdy. Prodıýser Qanat Tórebaıdyń aıtýynsha, fılmde otandyq jáne sheteldik tanymal akterler boı kórsetedi. 31 mamyr kúni túsirilim toby Almaty oblysyna attanady. Sońǵy túsirilimder Almatydaǵy «Qazaqfılm» kınostýdııasynyń aýmaǵynda jáne Talǵar qalasynyń Mádenıet saraıynda ótedi.
Aıgúl Ahanbaıqyzy, «Egemen Qazaqstan»
ALMATY