Nursultan Nazarbaev pen Sı Szınpın Qytaı Halyq Respýblıkasynyń kórme pavılonyn aralap kórý barysynda «Qazaqstan men Qytaı – Eýrazııanyń tranzıttik kópiri» atty telekópirge qatysty.
Qazaqstan Prezıdenti is-sharaǵa qatysýshylarǵa arnalǵan sózinde «Astana EKSPO-2017» halyqaralyq kórmesine qatysqany úshin Qytaı tarapyna rızashylyǵyn bildirdi.
– Qytaıdyń «Bolashaqtyń energııasy, Jasyl jibek joly» atty ekspozısııasy – EKSPO kórmesindegi eń úlken ekspozısııanyń biri. Qytaı Halyq Respýblıkasy qalpyna keltiriletin energııa kózderi salasynda álemdik kóshbasshy bolyp otyr. Sizdiń elińizdiń «EKSPO-2017» kórmesine qatysýy tehnologııalardy jáne mádenı baılanystardy damytýǵa zor úles qosatynyna senimdimin, – dedi Memleket basshysy.
Nursultan Nazarbaev «Qorǵas – Lıanıýngan» jańa kólik jolynyń iske qosylýynyń mańyzdylyǵyn atap ótip, bul jobany «Jibek jolynyń ekonomıkalyq beldeýi» men «Nurly jol» baǵdarlamalaryn ushtastyrýdaǵy tıimdi yntymaqtastyqtyń jarqyn mysaly dep atady.
– Búgin mańyzdy eki jobany iske asyrý bastaldy. Lıanıýngan portynan Ortalyq Azııa men Túrkııaǵa teńiz konteınerlerin tıegen alǵashqy poıyzdar jolǵa shyqty. «Qorǵas Shyǵys qaqpasy» arnaıy ekonomıkalyq aımaǵynyń qurǵaq portynan Qytaıdyń Chendý qalasyna jetkizetin konteıner joly iske qosyldy. 2020 jylǵa qaraı 2 mıllıon konteıner kórsetkishine qol jetkizý josparlanyp otyr. Bul elderimizdiń ekonomıkalyq ósip-órkendeýine septigin tıgizedi, – dedi Qazaqstan Prezıdenti.
Is-shara sońynda memleketter basshylary Eýrazııa keńistigindegi jańa konteınerlik qyzmet – Lıanıýngan Qazaqstan-Qytaı termınaly men «Qorǵas – Shyǵys qaqpasy» arnaıy ekonomıkalyq aımaǵy qurǵaq porty jumysynyń bastalýyna jol ashyp berdi.