Onyń aıtýynsha, qazirgi ýaqytta Arhıvte Aqparattandyrý tujyrymdamasy men baǵdarlamasy tolyq keshende júzege asyrylýda, Ulttyq arhıv qory qujattaryn jappaı sıfrlaý jumystary júrgizilýde, zertteýshiler úshin «vırtýaldy oqý zalynyń» aqparattyq qurylymy men modeli qurylǵan.
«Arhıvtiń 2021 jylǵa deıingi josparynda I sanatqa jatatyn arhıv isterin, ıaǵnı asa qundy jáne zertteýshiler tarapynan suranysqa ıe tarıhı qujattardy sıfrly formatqa kóshirý maqsaty tur. Osyndaı isterdiń jalpy sany 160 myń. Aǵymdaǵy jyldyń 1 qańtarynan bastap sanaǵanda 62 myń is sıfrly júıege kóshirilgen», dedi B.Japarov.
Spıkerdiń sózinshe, Arhıvtiń buryndary qoldanyp júrgen aqparattyq júıeleri ártúrli kompanııalarmen ár jyldary túrli baǵdarlamalyq platformalardy paıdalana otyryp jasalýy bıznes-prosesterdiń oryndalýynda qıyndyqtar alyp kelgen. «Barlyq bıznes-prosesterdi tıimdi avtomattandyrý maqsatynda arhıv 2014 jyldan bastap jańa Aqparattandyrý tujyrymdamasyn qabyldady. Ondaǵy basym baǵyttardyń biri bolyp Arhıv qyzmetiniń basty baǵyttary: jınaqtaý, saqtaýdy qamtamasyz etý, paıdalaný jáne ǵylymı-anyqtamalyq apparat qurý qyzmetterin tolyqtaı qamtı otyryp, Elektrondy arhıv júıesin qurý bolyp anyqtaldy», dep atap ótti ol.
Borıs Japarovtyń málimetinshe, el Prezıdentiniń Arhıvi aqparattyq tehnologııalardy keńinen qoldana otyryp, birneshe ǵylymı-zertteý jobalaryn júzege asyrýda. Aǵymdaǵy jyldyń 1 maýsymynan bastap Arhıvtiń saıtyna Qazaqstannyń jańa zaman tarıhynyń mańyzdy tarıhı oqıǵalaryn sıpattaıtyn 33 vırtýaldy tarıhı-qujattyq kórme ornalastyrylǵan. Olardyń qatarynda qazaqstandyqtardyń 1941-1945 jyldardaǵy Uly Otan soǵysyna qatysýy, halyqtardy Qazaqstanǵa deportasııalaý tarıhy, 1920-1930 jyldardaǵy qazaq alfavıtin latyn alfavıtine kóshirý jáne t.b. taqyryptardaǵy kórmeler bar.
«Álemniń barlyq zertteýshileri úshin vırtýaldy kórmelerde biregeı arhıv qujattary onlaın rejiminde qoljetimdi. Qazaqstan Respýblıkasy Prezıdenti Arhıviniń mundaı qadamǵa barýy Elbasynyń Bes ınstıtýttyq reformasynyń 87-qadamyna saı keledi», dedi Borıs Japparov.
Raýan QAIDAR, «Egemen Qazaqstan»