Fransýz jýrnalısi Lız Barsellını bizdiń baıtaq dalamyz, táýelsiz Qazaqstan týraly kitap jazyp shyqty. Jańa kitaptyń tusaýkeseri jýyrda Qaraǵandy qalasynda ótti. Fransýz tilinde jaryq kórgen qyzyqty týyndy «Kazakhstan. Jeune nation entre Chine, Russie et Europe» («Qazaqstan. Qytaı, Reseı, Eýropa toǵysyndaǵy qýatty memleket» dep atalady. Jalpy, Lız Barsellını eki jyldan beri Qazaqstannyń turǵyny. Ol osy ýaqyt aralyǵynda qazaq tilin birshama meńgerip, kitapty dala qazaqtarymen suhbat negizinde jazǵan. Qazaq halqynyń, onyń ishinde órshil jas astanalyqtardyń asqaq rýhy, baǵzydan kele jatqan qalyńdyq urlaý dástúri men qymyz daıyndaý tehnologııalary sııaqty taqyryptar kitap mazmunyn baıytqan. Kitap jazý barysynda sheteldik jýrnalıst qazaqtan shyqqan 50-ge tarta belgili tulǵamen suhbat qurǵan. Olardyń qatarynda aqyn Oljas Súleımenov, batyr, ǵaryshker Toqtar Áýbákirov, sýretshi Káripbek Kúıikov, jyrshy Uljan Baıbosynova syndy tanymal tulǵalar bar. Sondaı-aq, jýrnalıst shyǵarmashylyq jumysy barysynda qazaqstandyq qoǵam qaıratkerleriniń áleýmettik jelini saýatty paıdalanyp, qajetterine durys jaratyp otyrǵandyǵyn aıtady. Onyń aıtýynsha, Fransııada keıipkerińmen suhbat qurý úshin áleýmettik jelide kezdesý ýaqytyn, ornyn belgilep, áńgimelesý túri keńinen damymaǵan. Qazirgi tańda Lız Barsellını Qaraǵandydaǵy Fransýz alıansynyń fılıalynda fransýz tiliniń muǵalimi bolyp jumys istep jatyr. Kitaptyń Astanadaǵy tusaýkeseri 17 maýsym kúni ótpek. Al kúzge qaraı Parıj kitaphanalaryna jol tartady.
Mıras ASAN, «Egemen Qazaqstan»
Qaraǵandy oblysy