Oblystyq Tótenshe jaǵdaılar departamentiniń basshysy Alekseı Sovetovtiń málimetine qaraǵanda, jyl basynan beri mamandar tarapynan jabyq sý qoımalarynda 467 bala júzý mashyǵyna úıretilgen. Bul rette 66 jaǵajaıdyń shomylýshylarǵa daıar turǵandyǵyn da aıta ketken oryndy. Ásirese, demalys aımaqtarynyń kóp bóligi Býrabaı jáne Zerendi shıpajaı-kýrortty massıvterinde ornalasqan. Mine, osy demalys aımaqtarynda qaıǵyly oqıǵalardyń taban astynda oryn alyp jatýy ókinishti. Mysal da jeterlik. Aqmola TJD aqparattaryna júginsek, ótken jyly 22 adam sýǵa ketipti. Sonyń bireýi bala kórinedi. Sondaı qaıǵyly jaǵdaılardyń kópshiligi ishimdik iship, sýǵa túsýden týyndaıdy eken. Budan basqa, shomylýshylar sýǵa túskende qaýipsizdik erejelerin saqtaı bermeıtindigi taǵy bar. Eń soraqysy sol, ata-analary balalaryn qaraýsyz qaldyratyndyǵy. Qaraýsyz qalǵan bala ózgelerge elikteıtinin eskersek, olardy der kezinde qutqaryp qalý da múmkin emestigi belgili. Sondyqtan da Tótenshe jaǵdaılar departamenti turaqty negizde balalarǵa shomylýdy úıretýdi qolǵa alǵan. Qys mezgili shomylý mashyǵy jabyq sý qoımalarynda (basseınderde) júrgizilse, al jaz mezgilderinde mundaı jattyǵýlar ashyq sý qoımalarynda júzege asyrylyp keledi. Oblys ortalyǵynda jazǵy jattyǵýlar Qopa kólinde júrgizilýde.
Asqar Turapbaıuly, «Egemen Qazaqstan»
Aqmola oblysy