Keńes músheleri men ǵylymı-saraptamalyq toptar, Assambleıa kafedralarynyń jetekshileri, memlekettik organdar men joǵary oqý oryndarynyń ókilderi qatysqan jıynǵa QHA Tóraǵasynyń orynbasary Darhan Myńbaı jetekshilik etip, Memleket basshysynyń «Bolashaqqa baǵdar: rýhanı jańǵyrý» maqalasynda aıtylǵan mindetterdiń mán-jaıy jan-jaqty qarastyryldy. Ǵylymı-saraptamalyq keńestiń elý múshesi qatysqan basqosýda QHA qyzmetin rýhanı jańǵyrtý boıynsha ǵylymı-saraptamalyq turǵyda súıemeldeýdiń tujyrymdamalyq jáne ádisnamalyq máseleleri qaralyp, Assambleıa kafedralarynyń jumys tájirıbesi men ózekti mindetteri naqtylandy ári ótken jylǵy ǵylymı-zertteýlerdiń qorytyndylary zerdelendi. Sonymen qatar, jıynda talqylanǵan eń mańyzdy máseleniń biri – ǴSK-niń keleshek jumys josparyna Elbasy maqalasynda ekshep kórsetilgen baǵyttar boıynsha birqatar túzetýler engizý jónindegi sheshimniń qabyldanýy boldy. «Memleket basshysy jarııalaǵan maqala sheńberinde elimizde qyzý qolǵa alynyp jatqan «Týǵan jer» baǵdarlamasyn Qazaqstan halqy Assambleıasy tolyq qoldaıdy ári onyń jobalaryn júzege asyrýǵa belsendi atsalysatyn bolady. Sondaı-aq, qoǵamdyq sanany jańǵyrtý baǵytyndaǵy jumystarda basymdyq berilýi tıis tetikter – azamattardyń teń quqynyń saqtalýy men halyqtyń nanym-senim, salt-dástúri jáne ulttyq qundylyqtarynyń dáriptelýine selkeý túspeýin qamtamasyz etý bolyp tabylady. Osy oraıda, qoǵam tynysynyń barometri sanalatyn búgingi jastarǵa túrli qoldaýlar bildire otyryp, olardyń búgingi qoǵamǵa erkin sińisip, jedel beıimdelip ketýine barynsha jaǵdaılar jasalýy tıis», dedi D.Myńbaı. Jıynda jastar arasynda qoǵamdyq sanany jańǵyrtý boıynsha Qazaqstan halqy Assambleıasy kafedralarynyń tájirıbesi men maqsat-mindetteri de keńinen sóz boldy. Atalǵan taqyrypta QHA Tóraǵasynyń orynbasary Sergeı Vıshnıak, Ǵylymı-saraptamalyq keńes múshesi, M.Qozybaev atyndaǵy Soltústik Qazaqstan memlekettik ýnıversıtetindegi QHA kafedrasynyń meńgerýshisi Lıýdmıla Grıvennaıa sekildi sala mamandary sóz alyp, óz oılaryn ortaǵa saldy. Al Aqmola oblystyq Ardagerler keńesiniń tóraǵasy, Ǵylymı-saraptamalyq keńes múshesi Ǵosman Tóleǵul Memleket basshysynyń maqalasy jarqyn bolashaqqa jeteleıtin basty qujat ekendigin atap ótti. «Qoǵamdyq saıası jaǵdaıdyń turaqtalýy men el ishindegi áleýmettik-turmystyq máselelerdiń tıimdi sheshilýinde «Rýhanı jańǵyrý: bolashaqqa baǵdar» maqalasy bizdiń basty qujatymyzǵa aınalyp otyr. Tipti, osy kúnderi álemdi alańdatyp otyrǵan ekstremızm men terrorızmge qarsy kúres baǵytyndaǵy jospar-jobalardy atap kórsetý arqyly maqalanyń mazmuny Ǵylymı-saraptamalyq keńes jumysyn shırata túskendeı. Bul sondaı mán-mazmunymen qundy ári sonysy úshin kópshiliktiń kóńilinen shyǵýda. Al endi búgingideı basqosýlar arqyly bizdiń aldaǵy maqsat-mindetimiz aıqyndalyp, ony júzege asyrý merzimderi mejelenetin bolady», dedi ol. Otyrysta qoǵamdyq sanany jańǵyrtý prosesterin ǵylymı-saraptamalyq súıemeldeýdiń tujyrymdamalyq jáne ádistemelik tásilderi talqylanyp, Ǵylymı-saraptamalyq keńes qurylymyna ózgerister men tolyqtyrýlar engizý máselesi de kún tártibine shyǵaryldy. Sondaı-aq, qazaqstandyq biregeılikti nyǵaıtý men damytýdyń tarıhy, quqyqtyq jáne saıası aspektileri boıynsha ǵylymı-saraptamalyq jınaqty baspaǵa usyný týraly oń sheshim qabyldandy.
Nurlybek DOSYBAI, «Egemen Qazaqstan»