Kereký óńiri de ónerli óńir, Isanyń, Jaıaý Musanyń, Maıranyń eli. Shalǵaı aýyldarda júrgen daryndy ánshiler, kúıshiler jeterlik. Buǵan deıin «Men-qazaqpyn» mega jobasyn qoldaý maqsatynda «Qazaqstan-Pavlodar» telearnasy jergilikti jastar arasynda fleshmob ótkizip, Ertis ózeni jaǵasynda «Qara jorǵa» bıin bıledi. О́ıtkeni, jurtshylyq kópten beri kútip, saǵynyp júrgen ulttyq ónerdi nasıhattaıtyn ulttyq jobany qoldaý mańyzdy.
Endi mine, 23 maýsym kúni oblys ortalyǵynda ótken mega-jobanyń oblystyq kezeńine 35 ónerli jas qatysty. О́ner, án baıqaýy qalanyń ortalyq alańymen men Ertis ózeniniń jaǵalaýynda boldy. Jınalǵan jurtshylyqqa jergilikti qolóner sheberleri men zergerlerdiń kórmesi ashyldy.
Baıqaýdyń qatysýshylary "Shańyraq" xalyq shyǵarmashylyǵy ortalyǵynda án shyrqady. Dástúrli ánderimizdi oryndaıtyn ánshi Erlan Rysqalı bastaǵan qazylar alqasy keldi. Ortalyqtyń mamany Amangeldi Ábdiqadyrdyń aıtýynsha, aýyl, qalalarda da irikteý kezeńi ótti. Jobaǵa 18-40 jas aralyǵyndaǵy úmitker qatysa alady. Oblystaǵy óner báıgesinde tanylǵan ánshiler kúzde Astanadaǵy «Qazmedıa» ortalyǵynda ótetin gala konsertte taǵy da óner saıysyna qatysady. Baıqaý arnanyń efırinen tikeleı kórsetiledi.
Televızııalyq jobanyń oblystyq irikteý kezeńine dástúrli ánshiler, termeshiler jáne kúıshiler qatysty. Ánshi Nurbolat Ábilxan, termeshi Nurjan Sarqambaev, kúıshi Bekzat Sábıxanov júldeger atandy. Endi úsheýi de jobanyń respýblıkalyq kezeńinde óner kórsetip, óner báıgesinen kórinbekshi.
Farıda Byqaı
«Egemen Qazaqstan»
Pavlodar
