Foto: QazAvtoJol
Aqmola oblysynda «Astana – Pavlodar» avtojolynda jol qyzmetteri sý basý saldaryn jedel joıý jumystaryn júrgizip jatyr.
«KazAvtoJol» málimetinshe, «Astana – Shiderti – Pavlodar – Ýspenka – RF shekarasy (Qosaq ótkizý pýnkti)» avtojolynyń 117-shaqyrymynda 27 naýryz keshkisin uzyndyǵy shamamen 50 metr, tereńdigi 15–20 sm bolatyn erigen sý tasqyny tirkelgen. Bul jaǵdaı maýsymdyq sý kóleminiń artýy men muzdyń erýine baılanysty bolǵan.
Qazirgi ýaqytta jaǵdaı tolyq baqylaýǵa alyndy. Oqıǵa ornynda «Qazservıs» JShS-niń (Aqmola oblystyq fılıaly) mamandary jumyldyrylǵan. Jol tósemin nyǵaıtý, topyraq tógý jáne sý aǵynyn retteý úshin qorǵanysh úıindisin jasaý jumystary júrgizilip jatyr.
Atalǵan ýchaskede qozǵalys jabylǵan joq, kólik keptelisi baıqalmaıdy. Qaýipsizdikti arttyrý úshin arnaıy belgi baǵandary ornatylyp, jol jaǵdaıyna turaqty baqylaý uıymdastyrylǵan. Eldi mekenderge qaýip joq. Jol qyzmetteri táýlik boıy monıtorıng júrgizip, qozǵalystyń qaýipsiz ári úzdiksiz bolýyn qamtamasyz etý sharalaryn jalǵastyryp jatyr.
Al kórshiles Qaraǵandy oblysynda 27 naýryz keshki ýaqytta Qaraǵandy – Temirtaý tasjolynyń bir bóligin sý basty.
Oblys ákimdiginiń baspasóz qyzmeti málim etkendeı, qardyń qarqyndy erýine baılanysty joldyń bir jolaǵynda erigen sý jınalǵan. Atalǵan aýmaqta bóget jasaý jumystary júrgizildi, kólik qozǵalysy toqtatylǵan joq.
Aıta keteıik, buǵan deıin Qostanaı oblysynda respýblıkalyq mańyzy bar tasjoldyń bir ýchaskesi sý tasqyny saldarynan jabylyp qalǵanyn habarlaǵan edik.
