Aqtóbe oblysy kúnderiniń saltanatty ashylýy EKSPO-2017 kórmesiniń aýmaǵynda ornalasqan amfıteatrda ótti. Jınalǵan qaýymǵa «Aqtóbe – qutty meken» atty gala-konsert boldy. Merekelik sharaǵa «I am a Singer» halyqaralyq konkýrsynyń fınalısi Dımash Qudaıbergen, sondaı-aq, qazaq estradasynyń juldyzdary, Aqtóbe oblysynyń shyǵarmashylyq ujymdary, jalpy sany 600-den asa ónerpaz qatysty.
Mádenı kúnderdiń jalǵasy keshe Astana qalasynyń mańyndaǵy «Qazanat» ıppodromyndaǵy «Etnoaýylda» jalǵasty. Bul jerde óńirdiń shyǵarmashylyq ujymdarynyń qatysýymen «El júregi Astanaǵa – Araıly Aqtóbeden» atty teatrlandyrylǵan etno konserttik baǵdarlamasy ótti.
Bul kúni A.Jubanov atyndaǵy qazaq halyqtyq aspaptary orkestri jınalǵan qaýymdy án-kúıge bólese, T.Ahtanov atyndaǵy oblystyq drama teatrynyń ártisteri «Aıman-Sholpan» mýzykalyq spektaklin qoıdy. Al «Alaqaı» qýyrshaq teatrynyń oryndaýyndaǵy «Jaına, jadyra, dostar» atty baǵdarlama qonaqtardy qýanyshqa bóledi.
– Bas qalamyzǵa óńirimizdiń balqaımaqtaryn ertip keldik. «Aqtóbe – qutty meken» atty gala-konsertte ónerpazdarymyz óz ónerin pash etti. Al álemdik sahnada jarqyrap shyqqan jas juldyzymyz Dımash Qudaıbergen sharamyzdyń kórkine kórik bere tústi. «Etnoaýylda» qoıǵan Aqtóbeniń tarıhy kórermender kóńilinen jyly oryn taba bildi dep úmittenemin, – dedi T.Ahtanov atyndaǵy oblystyq drama teatrynyń rejısseri Eltaı Kemal.
Uıymdastyrýshylar óńir tarıhyn joǵary deńgeıde sahnalaı bilgeni anyq. Sebebi, Ábilqaıyr han, Edige batyr, Móńke bı sekildi nar tulǵalar tarıh qoınaýynan syr shertkendeı áserde qaldyrdy. Ásirese, Móńke bıdiń «Túrli-túrli halyq bolady, yntymaǵy berik bolady. Alla halqymyzdyń tutastyǵyn, amandyǵyn bergeı!» degende sol babalarymyzdyń arman-tilegi búginde bizdi osyndaı beıbit kúnge jetkizip otyr degen oı qaldyryp jatty.
– «Aıman-Sholpan» spektakli buryn repertýarymyzda bolǵan. 20 jyl buryn alǵash ret sahnalaǵanbyz. Kórermen jyly qabyldady. Biraq, sońǵy úsh jylda belgili sebepterge baılanysty toqtap qaldy. EKSPO aıasynda ótetin mádenı kúnderge oraı qoıylymdy qaıta jańǵyrttyq, – dedi «Aıman-Sholpan» spektakliniń rejısseri Dámetken Qusaıynova.
Bes kúnge jalǵasatyn sharada «Aqtóbe oblysynyń qazynasy» ulttyq geografııalyq dúnıeler kórmesi, «Aqtóbe manýfaktýralary» atty kartınalar kórmesi jurtshylyq nazaryna usynylady.
Aıan ÁBDÝÁLI, «Egemen Qazaqstan»