«Túrikmenstanda gazdan energııa alý sharalary keńinen damyǵan. Bizde qýatty gaz týrbınasy salyndy. Elektr jelileri tartylýda. Sonyń arqasynda energııany shetelge satýǵa múmkindik bar. Túrikmenstannyń ulttyq kúninde biz barlyq qazaqstandyqtardy óz pavılonymyzǵa shaqyramyz. Ol jerde túrikmen halqynyń balamaly energııa salasyndaǵy jetistikterimen tanysýǵa bolady», dedi Túrikmenstannyń saýda-ekonomıkalyq palatasy tóraǵasynyń orynbasary Dáýletkeldi Rejepov. Pavılonda ekologııalyq elektr stansasynyń jobasymen tanysýǵa múmkindik bar. Ol Túrikmenstannyń ońtústiginde salynyp jatyr. Sonymen qatar, onda Gındýkýsh sý-elektr stansasynyń maketi ornalasqan. Atalǵan stansanyń jumys istep jatqanyna 100 jyldan asypty, tipti biraz qural-jabdyqtary sol kezden beri áli saqtalǵan. Pavılonnyń taqyryby – «Tabıǵat – sheksiz energııanyń kózi». «Balamaly energııany Qaraqum shólinde kóptep óndirýge bolady. Budan bólek, bizdiń ǵalymdarymyz ekologııalyq taza fermanyń úlgisin oılap tapty», dedi D.Rejepov.
Astanadaǵy EKSPO-2017 halyqaralyq kórmesinde Túrikmenstannyń ulttyq kúni ótti. Saltanatty sharada qos memlekettiń ánurandary oryndalyp, týlary kóterildi. Sodan keıin túrikmen halqynyń kórkemónerpazdary ulttyq án-jyryn, bıin pash etip, kórermendi qýanyshqa bóledi.