Memlekettiń tanymal ánshisi Nık Kosova sharada Somalı dástúrli áýenderiniń jelisine qurylǵan afro-pop ánderin oryndady. Olardyń EKSPO-daǵy tól meıramyn dál 1 shildege oraılastyrýynyń ózindik máni bar eken. 1960 jyldyń 1 shildesinde Somalı-lend pen Somalı birigip, Somalı memleketin qurǵan. Qazir federatıvtik respýblıka. Sonaý Shyǵys Afrıkadan kelgen somalılikterdiń aıtýynsha, elderinde jıi qurǵaqshylyq bolady. Sondyqtan jasyl energetıkany, osy salaǵa qatysty tehnologııany meńgerý joldaryn qarastyrýda. Olardyń basty maqsaty – balamaly energııany qoldanýda kósh bastap turǵan memleketterdiń ozyq jobalarymen tanysyp, áriptestik ornatý.
Merekeniń resmı bóliminde Aqparat jáne kommýnıkasııalar mınıstrliginiń jaýapty hatshysy Janat Qojahmetov sóz sóılep, qonaqtarǵa degen jyly lebizin bildirdi. О́z kezeginde Somalı Premer-mınıstriniń ekonomıkalyq máseleler jónindegi aǵa keńesshisi Abdýllahı Iýsýf Mohamed eki memlekettiń de Islam yntymaqtastyǵy uıymyna múshe jáne dıplomatııalyq qarym-qatynasta ekenin aıtty. «Osy múmkindikti paıdalana otyryp, Qazaqstanmen saýda qarym-qatynasyn nyǵaıtýǵa nıettimiz. Sol arqyly jasyl tehnologııa, munaı-gaz jáne taý-ken barlaý jumystary salalaryndaǵy yntymaqtastyqtyń negizin qalaımyz», dedi ol. Abdýllahı Iýsýftyń aıtýynsha, kórmeniń «Bolashaq energııasy» taqyryby qazba otynǵa táýeldilikti barynsha azaıtýdy zertteıtin óte mańyzdy joba. Somalı shara aıasynda mádenı jáne jańartylatyn energııa bastamalaryn usynady, ıdeıalarymen bólisedi, almasady.
Somalı respýblıkasynyń ókili Lýshký Valýshıký Afrıka qurlyǵynan EKSPO-2017 kórmesine jıyrmaǵa jýyq memleket qatysyp jatqanyn jetkizdi. Barlyǵy da jańartylǵan energııany tabystyń kózi sanaıdy eken. «Somalıdiń de kún energııasyna qatysty jobalary bar. Ony áli de tolyqtyra tússek deımiz. Bizge bastysy tájirıbe jınaqtaý kerek. Al Qazaqstan maǵan unady. Kórmeniń dál osylaı joǵary deńgeıde ótip jatqandyǵy Prezıdent Nursultan Nazarbaevtyń arqasy der edim», dep aǵynan jaryldy ol.