Alyp laınerdiń Almatydan áýege kóterilgeni ázirde ǵana sııaqty edi. Illıýmınatordan qansha ıtinip tóngenimizben, Alataýdyń qar basqan silemderi birtindep alystaı bastady. Aq bultqa sińip kete bardyq. Erkin tynystaǵan espen ilesip jaılanǵan aqyl da qııalǵa shomady. Aspan astynyń ǵajaby osy-aý... Qazaqtyń qashyqtyqty ólsheıtin dástúrli tanymy qyzyq qoı. Qıyr shetti beıneleı kelip «Ushqan qustyń qanaty talady...» deı salady. Ásilinde, qazirgi ólshemde temir kóliktiń dońǵalaǵy tozyp, ushaqtyń beli talyp jetetin qashyqtyqty zamanynda salt atpen júrip ótip, ıgerip qoıǵandyǵyna rızashylyqpen aıtasyń ǵoı. Áıtpese, baıtaq atamekenimizdiń kólemine qaǵaz ústinen kóz júgirtip otyryp, «Qus qanaty ne táıiri...» deısiń! Osy biz ushaqpen 2 saǵatqa jýyq ýaqytta eńseretin Alataý men Arqanyń araqashyqtyǵy... 1215 shaqyrymǵa teń emes pe? ...Qalǵyp ketken jolaýshyny stıýardessanyń sál aksentti daýsy túrtip oıatqandaı boldy: «Qurmetti jolaýshylar! Biz mingen ushaq sanaýly mınýttardan keıin Astana qalasyndaǵy Nursultan Nazarbaev halyqaralyq áýejaıyna kelip qonady...» Qaǵys estimegen ekenbiz... Mássaǵan, mine jańalyq! Endigi jerde Astananyń áýe keńistigine engen barlyq baǵyttaǵy ushaq bortyndaǵy alǵashqy habarlama joldary osylaısha aıtylatyn boldy. Sebebi, el Úkimetiniń 2017 jylǵy 20 maýsymdaǵy №381 qaýlysyna sáıkes Astana halyqaralyq áýejaıyna Qazaqstan Respýblıkasynyń Prezıdenti Nursultan Nazarbaevtyń esimi berildi... Ǵumyr saparynda alys-jaqyn qashyqtyqty ushaqpen eńsergen jandar túsinedi, jolaýshy úshin kez kelgen eldegi mańyzdy oryn – áýejaılar. Álgi «Teatr kıim ilgishten bastalady» degen jattandy sózge sál boıaý jaǵyp jibersek, memlekettiń qaqpasy áýejaıdan bastap ashylatynyn beınelep aıtqandaı bolamyz. Demek, Astana áýejaıynyń Elbasy esimimen atalýy ádiletti sheshim bolýy tıis. Bizdiń bul oıymyzdy qazaqtyń úshinshi ǵaryshkeri, Halyq qaharmany Aıdyn Aıymbetov bylaısha nyǵyzdaı tústi: – Astana áýejaıy – bas qalanyń ǵana emes, táýelsiz elimizdiń negizgi qaqpasy, basty áýe dálizi. Áýejaıǵa Elbasy esiminiń berilýi eldiń eldigin, erdiń erligin tereńnen tanyta túsetin qutty qadam boldy dep bilemiz. Biz únemi áýede júremiz, máńgi asqaq kórinetin aspanda qyrandaı qalyqtaǵan áskerı qyzmetimizde bizden qalt jibermes qyraǵylyq talap etiledi. Osy jaýapty da kúrdeli qyzmet barysynda elimizge záý bıikten kóz sala júrip, boıymyzdy únemi maqtanysh sezimi bıleıdi. Endi Astana áýejaıynyń aty atalyp, tóbesi kóringen saıyn bizdiń júregimizde sol eljandylyq sezimi eselene túsetin bolady... Eljandylyq degennen eske túsedi. О́tkende Astanada Dúnıejúzi qazaqtarynyń quryltaıy ótti. Sondaǵy qurmetti qonaqtyń biri, taekvondadan Túrkııanyń chempıony Kárim Ilııas baýyrymyz «Men Ystanbuldaǵy Atatúrik aeroportynan ushyp kelip edim, endi qaıtarda Astanadaǵy Nursultan Nazarbaev halyqaralyq áýejaıynan attanatynyma qýanyshtymyn...» degen edi. Barsha qazaqtyń qýanyshy uzaǵynan bolǵaı!
Qalmahanbet MUQAMETQALI, «Egemen Qazaqstan»