Jambyl oblysynyń ákimi Kárim Kókirekbaev Jetisý ólkesine arnaıy issaparmen keldi. At arytyp, ton tozdyra qoıardaı emes, qoıy qoralas, órisi aralas jatqan kórshi oblystan kelgen qurmetti delegasııany Almaty oblysynyń ákimi Amandyq Batalov kútip aldy. Mundaıda «bizderde mynadaı bar, mynadaı bar» deıtin qur dańǵoı maqtan emes, tájirıbe almasý maqsatynda atqarǵan sharýań men tyndyrǵan isińdi qonaqqa kórsetpek paryz. Jetisý jurtshylyǵynan úırener dúnıe kóp ekenin ózi de aıta kelgen Jambyl oblysy ákiminiń de dittegeni «yrys juǵysady» támsili tóńireginde bolǵany anyq.
О́ńir basshysy qonaqtardy aldymen Kóksý aýdanyna qarasty «Alım – Taıar» jeke sharýa qojalyǵynyń qant qyzylshasy alqabynda bastap bardy. Irgetasy 1999 jyly qalanǵan, búginde óz salasy boıynsha talaıǵa úlgi kórsetip, jón silteıtin dárejege jetken sharýashylyq bıyl ortasha eseppen gektaryna 600 sentnerden ónim alýdy josparlap otyr. Budan bólek kókónis, maıburshaq, baqsha ónimderin egýmen aınalysyp otyrǵan sharýa qojalyǵynyń jalpy egistik kólemi 121 gektardy quraıdy.
Egis alqabyn aralaǵan soń, qonaqtar «Kóksý qant zaýyty» JShS-ne baryp, jetisýlyqtardyń bıylǵy qantqyzylshasyn ósirý men ony óńdeý baǵytyndaǵy jetken jetistikterimen tanysty.
Osydan biraz jyl buryn óńirlerińizge arnaıy saparlaı kelgen Elbasy tapsyrmasyn tııanaqty oryndaý jolynda bar kúshterińizdi jumsap kele jatqandaryńyzdy bilemiz. Onyń nátıjesin búgin biz de kórip, kókeıge túıip otyrmyz. Biz úshin agrarlyq aımaq degen aty bar sizderdiń oblyspen tájirıbe almasýdyń mańyzy zor. Aldaǵy ýaqytta bul bastama óz jemisin beredi dep senemiz, – dedi Kárim Kókirekbaev egis alqabymen qant zaýytynan alǵan áseri jaıly.
Budan arǵy sapar oblys ortalyǵy Taldyqorǵan qalasynda jalǵasty. Qaladaǵy ótken jyly ǵana qoldanysqa berilgen Oqýshylar saraıy men Jastarǵa qyzmet kórsetý ortalyǵymen tanysty. Ártúrli úıirmelerge arnalǵan 45 kabınet, 4 sheberhana, 8 zerthana, úsh kórme zaly bar saraı men jumys izdeýshi jastarǵa qol ushyn berip, kómektsesý negizgi orynǵa qoıylǵan Jastar ortalyǵynyń jumysy da qonaqtar tarapynan joǵarǵy baǵaǵa ıe boldy.
«Jastar» parki men abattandyrylǵan Qaratal ózeniniń jaǵalaýy qala qonaqtarynyń eń aldymen at basyn tirer demalys ornyna aınalǵan. Kezdesýdi tym resmılendirmeı, qydyrystap, demalyp júrgen qala turǵyndarymen az-kem suhbat qurǵan, óz tarapynan suraq qoıǵan Jambyl óńiriniń basshysy Taraz qalasynyń ákimi Rústem Dáýletke Talas ózeniniń boıynan da osyndaı ádemi saıabaq salýdy tapsyrdy.
Resmı sapardan alǵan áseri jaıly jýrnalısterge bergen suhbatynda «Eýropa qalalaryna uqsap damyp kele jatqan» oblys ortalyǵy men Almatyny jalǵap jatqan joldan bastap, qant qyzylshasyn ósirýdegi jetistikter men jańalyqtar, «jańarǵan, jasarǵan Taldyqorǵan» jaıly jaqsy ásermen ketip bara jatqanyn aıtty.
Almaty oblysynyń ákimi Amandyq Batalov ta qonaqtarǵa qarata:
– О́zderińiz de bilesizder, men osydan eki jyl buryn sizderdiń oblystaryńyzǵa arnaıy issaparmen barǵanmyn. Tarıhı oqıǵa Qazaq handyǵynyń 550 jyldyǵyna arnalǵan úlken toıda da boldyq. «Aǵaıyn tatý bolsa, at kóp» demekshi, mine, búgin sizder de bizdiń elge kelip otyrsyzdar. Mundaı tyǵyz áriptestiktiń qajettiligin Elbasy da óz sózinde únemi aıtyp otyrady. Bul el men eldi, jer men jerdi jaqyndatyp, óńirler ekonomıkasynyń tyń serpinmen damýyna múmkindik beredi, – dedi. Jambyldyq aǵaıynnan úırener, úlgi alar dúnıe kóp ekenin, aldaǵy ýaqytta mundaı qarym-qatynastyń jıi bolatynyn aıtty.
Kezdesý sońy eki taraptyń aldaǵy ýaqytta birige atqarylatyn birneshe joba men ǵylymı-tehnıkalyq, saýda-ekonomıkalyq, gýmanıtarlyq baǵyttaǵy áriptestik týraly memorandýmǵa qol qoıýymen aıaqtaldy.
Almas NÚSIP, «Egemen Qazaqstan»
Sýrtterdi túsirgen Jumabaı Musabekov