Mádenıet jáne sport mınıstrliginiń qoldaýymen «EKSPO-2017» baǵdarlamasy aıasynda «Astana Opera» MOBT-da ótken opera óneriniń HHV halyqaralyq baıqaýy osy jyldyń jarqyn mádenı oqıǵalarynyń biri deýge tolyq negiz bar.
Jyl saıyn «Operalııaǵa» qatysý úshin júzdegen úmitkerden ótinim túsedi, olardyń ishinen tek tańdaýly 40 ánshi ǵana halyqaralyq qazylar alqasy aldynda óner kórsetý múmkindigin ıelenedi. Bir aıta keterligi, vokaldyq jarys álemniń túrli qalalarynda ótkizilip keledi. Osy jyly 17 elden qatysýshy ártister Astanaǵa at basyn burdy. Plasıdo Domıngonyń daýys berýge qatyspaıtyny belgili, alaıda, soǵan qaramastan opera maıtalmany barlyq baıqaý kezeńinde ánshilerge qoldan kelgenshe kómegin aıamaı, olardyń shyǵarmashylyǵy men ónerine qatysty aqyl-keńesin berip otyrýda esh jalyqqan joq.
Osy oraıda aıta ketetin jaıt, eń jas vokalshynyń Plasıdo Domıngonyń Los-Andjeles (AQSh) pen Valensııada (Ispanııa) ashqan jastar baǵdarlamasyna qatysýǵa múmkindigi bar. Biraq mundaı baqytqa kim ıe bolatynyn Domıngonyń ózi emes, baıqaýdyń uıymdastyrý komıteti sheshedi.
Dástúr boıynsha baıqaýdyń aqtyq kezeńiniń resmı ashylýynan keıin P.Domıngo «Astana Opera» sımfonııalyq orkestriniń dırıjerlik pýltine jaıǵasty. Eger aldyńǵy kezeńderde qatysýshylardyń qazylar aldynda 2 týyndy oryndaý múmkindigi bolsa, sheshýshi saıysta 14 qatysýshy bir operalyq arııadan ázirlegen edi.
Sarsýelany úzdik oryndaǵany úshin 5 qatysýshy-úmitker operettaǵa jaqyn bolyp keletin ıspan mýzykalyq-sahnalyq janrynan bir arııadan oryndady. Nátıjesinde Plasıdo Domıngonyń anasy, Pepıta Embıl de Domıngo syılyǵy jáne 10 myń dollar Adela Zaharıaǵa (soprano, Rýmynııa) buıyrdy, al maestro Domıngonyń ákesi, úlken-Plasıdo Domıngo syılyǵy men 10 myń dollardy Marko Chaponı (tenor, Italııa) aldy.
Rıhard Vagner men Rıhard Shtraýs operalarynan repertýardy úzdik oryndaǵany úshin ataqty shved ánshisi Bırgıt Nılson atyndaǵy qosymsha júlde men 15 myń dollar kólemindegi aqshalaı qarajat Oksana Sekerına (soprano, Reseı) men Borıs Prıglge (bas-barıton, Chehııa) buıyrdy.
Opera arııalary men sarsýela shyrqalǵannan keıin, barlyq qatysýshylar Plasıdo Domıngo súıemeldeýindegi «Astana Opera» orkestrimen maestronyń uly, kishi-Plasıdo Domıngo jazǵan «Operalııanyń» resmı ánuranyn oryndady.
Fınaldyq kezeń aıaqtalǵan soń, qazylar alqasy ǵana emes, sondaı-aq, kórermender de súıikti qatysýshysyna daýys berý múmkindigine ıe boldy. Aldyn ala berilgen qyzyl jáne kók tústi kartochkalardy baıqaýǵa qatysýshylardyń sýretteri bekitilgen arnaıy qoraptarǵa tastady. «Rolıks» kompanııasynyń ókili rolıks qol saǵaty túrindegi «Kórermen kózaıymy» júldesin Marııa Mýdrıak (soprano, Qazaqstan) pen Leon Kımge (barıton, Koreıa Respýblıkasy) tabys etti.
Bıyl Astanada ótken baıqaýda maestro Plasıdo Domıngo aqtyq saıysqa jetken, biraq negizgi aqshalaı qarajatqa qol jetkize almaǵan ərbir qatysýshyny 5000 dollar kólemindegi yntalandyrý syılyǵymen marapattaý týraly sheshim qabyldady. Yntalandyrý syılyǵyna Rýpert Entıknap (kontrtenor, Ulybrıtanııa), Sý Ion Pak (soprano, Koreıa), Vlada Borovko (soprano, Reseı), Emmet O’Henlon (barıton, AQSh), Rýslana Koval (soprano, Ýkraına), Damıana Mıssı (soprano, Italııa) ıe boldy.
– Kóptegen ánshiler bıik belesterdi baǵyndyryp úlgergen bolýy múmkin, biraq «Operalııa» bolmaǵanda olar týraly biz osynshama mol maǵlumatqa qanyǵar ma edik? Mine, bul «Operalııanyń» negizgi mindeti – álemge jańa ártisterdi tanytý, olardyń esimin barynsha pash etý, – dep atap ótti maestro Domıngo.
«Operalııaǵa» KSRO halyq ártisi Bıbigúl Tólegenova qurmetti qonaq retinde shaqyryldy. Ol ánshi, mýzykant, dırıjer Plasıdo Domıngonyń álemdik deńgeıdegi erekshe daryndy tulǵa ekenin atap ótti.
– «Operalııa» baıqaýynyń Qazaqstanda, elordamyzda ótkeni biz úshin úlken qurmet ári orasan zor maqtanysh, – dedi óz sózinde B.Tólegenova.
Qarshyǵa KÚLEN