Jyl: 2017
El: AQSh
Rejısser: Nıkolaı Arsel
Basty rólderde: Djekı Erl Heılı, Mettıý Makkonahı, Idrıs Elba, Fren Krans, Ebbı Lı
Ssenarıı: Anders Tomas Iensen, Akıva Goldsman, Djeff Pınkner, Nıkolaı Arsel
Prodıýser: Stıven Kıng, Ron Hovard, Braıan Greızer, Akıva Goldsman
Janr: Fentezı, Boevık, Fantastıka, Vestern
Bıýdjet: $60 000 000
Álemdik premera: 27 shilde 2017
Qazaqstandaǵy premera: 3 tamyz 2017
Jas shekteýi: PG-13 - 13 jasqa deıingi balalarǵa kórýge usynylmaıdy
Uzaqtyǵy: 95 mınýt
Fılmdegi bas keıipkerlerdi gollıvýd juldyzdary Idrıs Elba men Mettıý Makkonahıdiń somdaýy kınotýyndynyń ataǵyn áıgileı tústi. Al roman avtory Stıven Kıng basty róldegi mergenniń rólin bar qupııasy men aıbaryn túksıgen qabaǵyna jasyrǵan Klınt Istvýd tıpajy asha túser edi degen oı aıtady.
Nıý-Iork turǵyny 11 jasar Djeık Cheımberzdiń túsine únemi qara munara aınalasyndaǵy jumbaqqa toly aıqas enedi. Ol túsinde kórgen zulymdyq (Qara kıgen adam) pen ádilet jaqtaýshysynyń (mergen Roland) keskilesken tartysynyń sýretin qaǵazǵa salady. Ata-anasy balasynyń oqshaý ádetin psıhologııalyq aýrýǵa balap, klınıkaǵa emdeýge bekinedi. Osy sátte úıden qashyp qutylǵan bozbala magııalyq portal arqyly ózge álemge tap bolady. Oqıǵa shıelenisi de osy tustan bastalady. Álemdegi beıbitshilik epısentri sanalatyn qara munara mańaıyndaǵy sharpyǵan órt pen zulmatty toqtatýǵa umtylǵan mergen Roland (Idrıs Elba) Qara kıgen adammen (Mettıý Makkonahı) ashyq shaıqasqa túsedi.
«Qara munara» fılmi túsiriledi degen sóz sonaý 2007 jyldan beri aıtylyp kelgen-tuǵyn. Árqıly sebeppen rejısserler túsirýden bas tartyp, tek 2015 jyly ǵana joba rejısseri bolyp Nıkolaı Arsel bekitildi. Kartınanyń túsirilim jumystary Ońtústik Afrıka men Nıý-Iork qalasynda júrgizildi. 2016 jyly qazan aıynda fılm testik júıede aýdıtorııa nazaryna usynyldy. Alaıda kópshilik fılmdi júıesiz, shashyrańqy dep baǵalap, sońyra óndiris kompanııasy Sony Pictures Entertainment pen MRS fılmniń keı tustaryn qaıta túsirý jumystaryna 6 mıllıon AQSh dollaryn jumsaǵandyǵy jóninde aıtylady. Osynsha tartysty uzaq joldan ótken fılm týraly qazir kınosynshylar alýan túrli pikir aıtyp jatyr. Ásirese baılanyssyz sıýjetter jelisine qatysty «ón boıy tolǵan katastrofa, áýpirimdep júrip qurastyrylǵan fılm» dep synaldy.
Nıkolaı Arsel – danııalyq rejısser, ssenarıst. Ol túsirgen A Royal Affair (Korolevskıı roman) fılmi Berlın kınofestıvalinde «Altyn aıý» júldesimen (2012) marapattalǵan, sonymen birge «Altyn globýs» (2013), Oskar (2013) syılyqtarynyń «Úzdik shetel fılmi» atalymyna ıe bolǵan.
Aıa О́MIRTAI,
«Egemen Qazaqstan»
«Apta fılmi» jobasy «Arman» kınoteatrynyń qoldaýymen júrgiziledi. Irgesi 1968 jyly qalanǵan kınoteatr búginde el ómirinde eleýli orny bar mádenı orynǵa aınaldy.