Múmkindigi shekteýli jannyń ómirge qushtarlyǵy sheksiz

Jumyr basty pendeni aldynda qandaı qıyn ótkelder men buralań joldar kútip turǵany boljaýsyz. Sergeı segiz jyl buryn taǵdyr tálkegine ushyraımyn dep esh oılamaǵan. Qurylys ýchaskesinde eńbek etip, el qatarly nápaqasyn taýyp júrdi. Jazym degen aıaq astynan. Birde tehnıkalyq qaýipsizdik sharalarynyń saqtalmaýy saldarynan jumys ýchaske­sin­de óndiristik jaraqat alyp, aýyr halde aýrýhanaǵa jetkizildi. Es-túsinen aırylyp, tósekte tańýly jatqan 27 jastaǵy tepse temir úzetin jigit qos aıaǵynyń kesilip, molaq bolyp qalǵanyn bilmedi. Keıin taǵy birneshe ota jasalyp, birinshi top­taǵy múgedekter qataryna qosyldy. Buǵan deıin densaýlyǵyna kinárat artyp kórmegen ol úshin endi azapqa toly kúnder men túnder bastaldy. Tán j­a­ra­qaty jazylar-aý, jan jarasynan qa­laı saýyǵarmyn degen saryýaıymǵa sa­lyn­ǵanda ómirden kúder úzip ketetin. Erteńge degen senimsizdik tula boıyn tumshalap, oıyn áldebir qorqynysh sezim bıleıtin.Týǵan-týystary, dostary sabyrǵa shaqyryp, qansha basý aıtqanmen, kúırektikke salynyp, sál nársege shyny sııaqty shytynap, kúıgelektene beretin. О́zi sııaqty bir beıbaqty kezdestirip, aqyl-keńesine qulaq túrmegende bordaı ezilip, júndeı tútilip júre berer me edi. Taǵdyrlasy «Meni kórmeısiń be? Eki aıaǵym, bir qolym joq bolsa da, masyl bolǵan emespin. Bireýge kiriptar bolýdan asqan qorlyq joq. Eńseńdi kóter. Esińdi jı. О́z kúshińe sen. Áli jassyń. Kórer qyzyǵyń alda», dep jiger bere sóılep, júrek túkpirindegi syryn jaıyp salǵan. Sóıtse, ol bastapqyda basqa túsken beınetke shydaı almaı, ishkilikke áýes bolypty. Tek jeke basynyń qajyr-qaıraty, alǵa qoıǵan maqsat-muratyna umtylýdyń arqasynda qoǵamdyq ortaǵa qaıta oralypty.  Osyndaı qaıraý sózderden keıin Sergeıdiń kóńili kóterilip, ózin ózgeshe keıipke túskendeı sezindi. Qolarbada tańylyp otyra bergenshe múmkindigi shekteýli adamdardyń qolynan da is keletinin dáleldeıin degen oı qanat bitirip, tomaǵasyn sypyrǵan qyran qussha dúr silkindi. Alaıda, mekeme-uıymdardyń tabaldyryǵyn tozdyrǵanmen, eshkim qushaq jaıa qarsy ala qoımady. Qaı esikti qaq­sa da, «bos jumys orny» joq!» degen áń­gime keltesinen qaırylady. Keı­bireý­ler­diń aıaýshylyq jasap, músir­keýshilik bildirgenin, bázbireý­lerdiń osyǵan ne kerek degendeı oqty kózben ata qaraǵanyn sezse de, syr bildirmedi. Beldi bekem býyp, táýekel etti. Qolónermen bala ke­zi­nen aınalysyp, qyr-syryn meńgerip alǵany osy joly kádege asty. Aǵa-inileriniń kómegimen úıdiń janyndaǵy saraıdy bosatyp, ustahanaǵa aınaldyrdy. Sodan aǵashtan neshe túrli buıymdar jasaýǵa bar ynta-jigerimen kirisip ketti. Ádepkide aýyr oıdan arylýdyń, ýaqyt ótkizýdiń ermegine sanasa, keıin shyǵarmashylyq qarym-qabiletine ushqyr qııal qosylyp, kóz jaýyn alar ádemi, áshekeıli ónimder sórelerden oryn ala bastady. Kórshileri men tanystary japa­tar­maǵaı satyp alyp, qosymsha tapsyrys túse bastaǵanyn kórip, taǵy bir she­shim­ge keldi. Ondaǵy oıy − ustahana aý­­qymyn keńeıtý, usaq-túıek isterden góri kúrdelisine aýysý. «Damý» qorynyń aı­maqtyq fılıaly arqyly qaıtarymsyz grant alýǵa bekindi. Múmkindigi shekteýli jan­dardy qoldaýǵa baǵyttalǵan arnaıy baǵ­darlama aıasynda kásipkerlik salasyn keńeıtsem degen ishki túısik alǵa jeteledi. Mekemeniń menedjerleri shaǵyn kásipkerlik retinde tirkelip, qajetti qujattardy jınap ákelýge keńes berdi. Aıtqan tapsyrmalardy tap-tuınaqtaı oryndap, «Damý-Kómek» baǵdarlamasyna qatysý múmkindigine ıe bolǵanda tóbesi kókke jetkendeı qýandy. «Juldyzdarǵa qara» jobasynyń qaıyrymdylyq qory arqyly 300 myń teńge qarajatqa qol jet­kizdi. Sanaýlylardyń qatarynda ili­gýin ózine kórsetilgen senim, qurmet dep túsindi. Qoǵamǵa kerek ekenin uǵyndy. Qaıtarymsyz grantqa úsh stanok satyp alyp, qustyń uıasyndaı tar jerge ornalastyrýǵa týra keldi. О́nimniń túr­le­ri kóbeıip, sapasy jaqsaryp, jurt­shylyq ta­rapynan suranys kóptep túse bastady. Qazaq­standa, Reseıde ótetin kórmelerge sha­qyrtý alyp, ónerli on saýsaǵynan ja­sal­ǵan buıymdar kórneki jerlerden oryn aldy. Aǵashtan túıin túıgen sheber ótinish aıta kelgen eshkimniń qolyn qaqqan emes. Kez kelgen tapsyrysty qabyldap, sapaly etip oryndap beredi. Keleshektegi maqsaty – úı jıhazdaryn jóndeý, jasaý kásibin ashyp, ózi sııaqty taǵdyrdyń aýyr taýqymetine ushyraǵan adamdardy jumyspen qamtý. Átteń, úı janyndaǵy sheberhana tar bolyp, tynysyn ashtyrmaı tur. Jazda amaldar edi. Qysta qıyn.  – Oryn jaıy sheshilse, qalǵan sharýalardy ózim-aq tyndyrar edim. Biraq ekinshi deńgeıli bankterden nesıe alý qıyn, talap-sharty kúshti. Biz sııaqty múgedekter túgil saý adamdardyń taýany sha­ǵylyp jatady. Ekinshiden, múmkindigi shek­teýli kásipkerler shyǵaratyn ónim­der­di satatyn saýda núkteleri joq. Al­ma­tyda ǵana arnaıy dúken jumys is­teı­di. Meni osy sanattaǵy jastardyń basyn biriktiretin «Qamqor», «Ardos jú­rek» syqyldy jergilikti qoǵamdyq bir­les­tikterdiń tirligi qyzyqtyrady. Olar­dyń atqaryp jatqan is-áreketteri, qoldaý jasalyp jatqany qýantady, – deıdi bizben oı bólisken Sergeı Sapko.  Sergeı bolashaqqa úlken úmitpen qaraıdy. Oblys ákiminiń qabyldaýynda bolyp, usynys-oılary qoldaý taýypty. Tıisti mekemeler keńirek oryn izdestirip jatqan kórinedi. «Damý» qoryna taǵy da qatysyp, baǵyn synap kórmek. Eki aıaǵy joq bolsa da, qalaı eńbek etýdiń úlgisin kór­setip kele jatqan qaısar jannyń ar­ma­ny oryndalar kúnderdiń alys emes­ti­gine seneıik.

О́mir ESQALI, «Egemen Qazaqstan»

PETROPAVL