Islam álemine rýhanı silkinis, jańǵyrý qajettiligi týyndap otyr. Bul týraly búgin elorda tórinde bastalǵan Islam yntymaqtastyq uıymynyń ǵylym jáne tehnologııalar jónindegi birinshi sammıtinde Qazaqstan Prezıdenti Nursultan Nazarbaev aıtty, dep habarlaıdy QazAqparat.
«Bıyl Qazaqstanda halyqty óziniń tarıhı bastaýlaryna jeteleıtin rýhanı jańǵyrý baǵdarlamasy iske asyrylady. Onyń aıasynda ulttyq sanany jańǵyrtý, rýhanı ıgeriletin ózekti máseleler qolǵa alynbaq. Osy oraıda ıslam álemine de rýhanı silkinis, jańǵyrý qajettiligi týyndap otyr degen oıdamyz», - dedi Elbasy.
Memleket basshysy adamzat tórtinshi ındýstrııalyq revolıýsııa qarsańynda turǵandyǵyn basa aıtty.
«2017 jyly ǵylymı-tehnıkalyq jáne ınnovasııalyq damýda jaqsy kórsetkishterge qol jetkizgen Islam yntymaqtastyq uıymynyń elderi az emes. Muny ǵalamdyq ınnovasııalar ındeksi arqyly kórip otyrmyz. Olardyń qatarynda Birikken Arab Ámirlikteri 35-shi, Malaızııa 37-shi, Túrkııa 43-shi, Katar 49-shy, Saýd Arabııasy 55-shi, Kýveıt 56-shy orynda jáne basqa da memleketter bar. Ǵalymdardyń izdenisine biz kómek kórsetýimiz qajet. Osy maqsatta, uıym aıasynda ǵylym men tehnologııany damytýǵa qosqan úlesi úshin syılyǵyn taǵaıyndaý týraly sheshim qabyldadyq. Búgin osy syılyqpen marapattaýdyń alǵashqy rásimin ótkizetin bolamyz», - dedi Nursultan Nazarbaev.