Jýyrda belgili teatr synshysy, marqum Áshirbek Syǵaıdyń ómiri men shyǵarmashylyǵyna arnalǵan «Syn sardary» atty kitap jaryqqa shyqty. Kitaptyń tusaýy elordadaǵy Ulttyq akademııalyq kitaphanada kesildi.
Tusaýkeserdi Memlekettik syılyqtyń ıegeri, jazýshy Tólen Ábdik júrgizdi. Ol teatr synshysynyń jan-jaqty talant ıesi bolǵanyn, ásirese bilimdiligin, qyraǵylyǵyn, iskerligin, uıymdastyrý qabiletiniń joǵary bolǵanyn, sheshendigin sóz etti. Soǵan qatysty erterekte bolǵan oqıǵalardy estelik retinde aıtyp, ózi bergen minezdemelerin dáıektep otyrdy. Jazýshy synshyǵa «qazaq teatrynyń ensıklopedııasy» degen baǵa berdi. Sondaı-aq, onyń kóp jazǵan keıipkerlerine de toqtaldy. Sol kóp keıipkerdiń biri – ańyz adam, áıgili akter, Qazaqstannyń Eńbek Eri Asanáli Áshimov. Áıgili akter Áshirbek Syǵaı jazbalarynyń kóregendikpen, asqan mádenıettilikpen jazylyp, zamanynda talaı akterdiń óz kemshiligin túzeýine túrtki bolǵanyn baıandady.
«Ol teatrdyń baqyty boldy. Akter, rejıssýra, dramatýrgııa – úsheýi oshaqtyń úsh butyndaı tutas dúnıe. Osy úsheýiniń basyn qosatyn adam – teatr synshysy. Bul turǵydan alǵanda Áshirbek óz mıssııasyn jaqsy oryndady. Meniń baqytym – Áshirbek sııaqty ini-dosymnyń bolýynda. Biz sháı despegen kúıi kettik»-degen Asanáli Áshimov osy kúnderde elordada ótip jatqan Áshirbek Syǵaıdyń 70 jyldyǵyna arnalǵan teatr festıvali jyl saıyn ótkizilip tursa degen úmitteri bar ekenin de málimdedi.
Eki saǵattan asa ýaqytqa sozylǵan keshte synshyny kóz kórgen, birge qyzmet istegen, talaı saparlarda birge júrgen, qamqorlyǵyn sezingen, eńbegin de, esimin de qurmet tutatyn qoǵamǵa tanymal kóptegen kisiler sóz aldy. Onyń ishinde aktrısa Merýert О́tekeshova, jazýshy Rahymjan Otarbaı, qoǵam qaıratkeri Orazgúl Asanǵazy, synshy Álııa Bópejanova, Baqyt Nurpeıis, kınotanýshy Názıra Rahmanqyzy, aǵa dosy túrkistandyq Jarylqasyn Áziretbergen, teatr synshysy Oleg Pıvovarov, tarıhshy Kamal Burhanov syndy túrli salanyń ókilderi Áshirbek Syǵaı týraly jyly esteliktermen bólisti. Ásirese, synshy, kınotanýshylar jaǵy marqumnyń synaǵanda eshkimniń janyn jaralamaı, sıpaı qamshylap, jibekteı jelpip jaý arttyrmaı jazǵan, syn mádenıetin bıik deńgeıge kótergen qasıetin sóz etisti.
Al endi «Syn sardary» atty kitapqa keler bolsaq, oǵan zamandas aqyn-jazýshylardyń, synshylardyń, aǵa býyn óner ókilderiniń, ónerdegi ini-qaryndastarynyń teatr synshysy týraly tolǵanystary, maqalalary men estelikteri, óleńderi engizilgen. Kitapty qurastyrǵan teatr synshysynyń jubaıy – Kúlásh Syǵaı. Ol kitapqa materıaldardy Áshirbek Syǵaı qaıtys bolǵan soń baspasóz betterinde jaryq kórgen materıaldardan toptastyrǵanyn áńgimeledi. Onyń aıtýynsha, kitaptyń ekinshi tusaýkeseri, ıaǵnı, tanystyrylymy Almaty qalasynda ótpek. Kitap memlekettik tapsyryspen, «Dástúr» baspasynan bes myń danamen shyǵyp otyr.
Aıgúl SEIIL, «Egemen Qazaqstan»