Taıaýda Qaraǵandyda Sybaılas jemqorlyqqa jáne kóleńkeli ekonomıkaǵa qarsy is-qımyl strategııasyn júzege asyrý boıynsha Arnaıy monıtorıngtik toptyń otyrysy ótti. Atalǵan organ Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qaraǵandy oblysy boıynsha departamenti janynda jumys atqarady.
Jıyn barysynda aıtylǵandaı, Qaraǵandy oblysynyń memlekettik organdarynyń qyzmettik kólikterine arnaıy emblemalar ornatý bastamasy respýblıkada quptaldy. Bul tájirıbeni elimiz boıynsha qoldaný usynysy jasaldy.
– Arnaıy monıtorıngtik toptyń keıingi otyrysynda memlekettik organdardyń qyzmettik kólikterinde erekshelik belgisin qoıý máselesi qarastyryldy. Qala jáne aýdan ákimderine qyzmettik kólikterge aıryqsha belgi ornatýdy qamtamasyz etý usynystary jasaldy, – dedi Arnaıy monıtorıngtik toptyń jetekshisi Ermek Ábildın.
Onyń aıtýynsha, búgingi tańda kóptegen ákimdikter men basqarmalar erekshelik belgilerin ornatqan. Alaıda ol jańashyldyqty elemegender de bar. Olardyń qatarynda – bilim basqarmasy, Abaı jáne Nura aýdandarynyń, Saran qalasynyń ákimdikteri bar.
– Keı memlekettik organdar belgilerdi ornatqandaryn rastaıtyn materıaldar jibergen joq. Ol degenimiz, atalǵan shara tek qaǵaz júzinde oryndalýy múmkin degendi bildiredi. Aıta keteıik, 2017 jyldyń 7 qyrkúıeginde ótken respýblıkalyq Arnaıy monıtorıngtik toptyń hattamasynda bizdiń bastamamyz respýblıkanyń barlyq ortalyq jáne jergilikti atqarý organdaryna usynyldy, – deıdi E.Ábildın.
Top músheleri jergilikti polısııa qyzmetimen birigip erekshelik belgileriniń ornatylǵanyn tekserý boıynsha reıd ótkizýdi usyndy. Otyrysta sonymen qatar 2015-2020 jyldarǵa sybaılas jemqorlyqqa qarsy strategııany júzege asyrý boıynsha úsh jyldyqta jasalatyn sharalar jospary talqylandy.
Mıras ASAN, «Egemen Qazaqstan» Qaraǵandy oblysy