QR Tuńǵysh Prezıdenti – Elbasy Qorynyń Almatydaǵy ókildiginde belgili jýrnalıst, «Aıqyn» gazetiniń tilshisi Qaıyrjan Tórejanovtyń «Syrtqy barlaý» atty kitabynyń tusaýkeseri ótti. Oqyrmanǵa jol tartqan sý jańa kitap elimizdegi barlaý qyzmeti týraly jazylǵan tuńǵysh derekti týyndy.
Ulttyq Qaýipsizdik Komıteti el tynyshtyǵynyń berik qorǵany. Alaıda, qyzyǵy men qupııasy mol bul salanyń qyzmeti jaıly kóp aıtyla bermeıdi. Avtor atalmysh eńbeginde barlaýshylardyń bylaıǵy jurt ańǵara bermeıtin erekshe qasıetterin, jaýapty jumystyń qyr-syryn búkpesiz de boıamasyz beıneleýge tyrysqan. Kitapta osy salanyń óristeýine óreli úles qosyp, qajyrly eńbek etken azamattardyń ǵıbratty joly keıingilerge úlgi retinde kórkem kórinis tapqan. «Qaıyrjan Tórejanov qalam qýatyn syry kópke belgisiz osy salanyń uńǵyl-shuńǵylyn zertteýge jumsaǵan. Jaryq kórip otyrǵan «Syrtqy barlaý» kitaby osynyń anyq dáleli,» deıdi kitaptyń tusaýkeserine jınalǵan zııaly qaýym ókilderi.
Tyń týyndynyń tusaýkeser rásiminde qazaqstandyq barlaý qyzmetine basshylyq jasaǵan generaldar – Talǵat Ámirǵalıev, Murat Syzdyqov, Ǵabıden Bekmuhamedovter oqyrmandarǵa jol tartqan jańa eńbekke aqjol tilep, aldaǵy ýaqytta barlaýshylar ómirinen syr shertetin osy tektes kitaptar kóptep jazylsa degen tilek pikirlerin bildirdi. Sondaı-aq Elordadan arnaıy kelgen respýblıkalyq UQK ardagerleri keńesiniń tóraǵasy Kenjebolat Beknazarov áriptesimizdi UQK tóraǵasynyń buıryǵymen berilgen «Ulttyq Qaýipsizdik Komıtetine 25 jyl» tósbelgisimen marapattady. Al, Syrtqy barlaý qyzmeti tarapynan Almaty ardagerler keńesiniń tóraǵasy general-maıor Bolat Meshinbaev «Syrbar» ofıserler jınalysynyń sheshimimen taǵaıyndalǵan 500 myń teńgeniń sertıfıkatyn jáne TMD arnaıy qyzmet ardagerleri keńesiniń atynan ardager-barlaýshy Qabdolda Bekjanov «P. Sýdoplatov» atyndaǵy medaldi tapsyrdy.
Eske salsaq, elimizdegi «Barlaý» qyzmeti Elbasy Jarlyǵymen 1997 jyldyń 5 qarashasynda qurylǵan edi. Osylaısha, syrtqy barlaý salasyndaǵy ýákiletti organnyń qurylǵanyna bıyl 20 jyl tolyp otyr.
– Jalpy, barlaýshylar degen kimder, olar dál qazir nemen aınalysyp júr degen suraqqa eshkim jaýap bere almaıdy. Barlaýshynyń qandaı qyzmette ekendigin tipti tyǵyz qarym-qatynas jasaıtyn kórshileriniń de bilmeýi zańdy. Olardyń ózderi atqaratyn qyzmetteri jaıly eń jaqyn adamdaryna, balalaryna, tipti nemerelerine de qupııalylyǵy ashylǵansha keıbir operasııalar týraly eshteńe aıta almaıdy. Sondyqtan osyndaı derekti kitap kerek. Kitaptyń jaryq kórýine «Syrbar» – Syrtqy barlaý qyzmeti tikeleı qoldaý kórsetti. Aldaǵy ýaqytta osy baǵytta serıaly kitaptar jazsam degen josparym bar, – deıdi «Syrtqy barlaý» kitabynyń avtory Qaıyrjan Tórejanov.
Shynaıy derekkózderden, arhıvterden alynǵan maqalalardyń negizinde jazylǵan óreli eńbek arqyly oqyrmandar otandyq barlaýshylardyń qyzmeti jaıly mol maǵlumatqa qanyǵatyn bolady. Sondyqtan tyń týyndy barsha oqyrmandardyń qyzyǵýshylyǵyn týdyrady degen senimdemiz.
Arman OKTIаBR,
«Egemen Qazaqstan»
ALMATY