Pavlodar qalasynyń №2 soty 34 jastaǵy jeke kásipshilikte menedjer bolyp jumys isteıtin Rýstam Gılmanovtyń (sottalýshy esimi ózgertildi) qylmystyq isin qarap, ony alty jylǵa bas bostandyǵynan aıyryp, jazasyn qatań tártiptegi túzeý kolonııasynda óteýge úkim shyǵardy. Bul onyń jastyǵyna qaramaı, tórtinshi ret sottalýy. Birneshe ret isti bolýyna basty sebep – sanaly túrde teris dinı ekstremıstik jolǵa túsip, aýyr qylmys jasaýy.
Ol alǵashqyda teris nıetti toptyń quramynda násildik, dinı dushpandyq pen arazdyqty qozdyrýǵa baǵyttalǵan, aldyn ala oılastyryp jasaǵan is-áreketi úshin isti bolsa, keıin azamattardyń óz mindetterin oryndaýdan bas tartýyna jáne ózge de zańǵa qaıshy is-áreketterdi jasaýǵa ıtermeleıtin dinı birlestikterdiń isine belsene qatysqany úshin sottaldy. Alaıda osyndaı qylmystyq top basshylary 2007 jyly qylmystyq birlestikti qurǵany jáne onyń isine qatysqany úshin uzaq merzimge bas bostandyǵynan aıyrylǵanyna qaramastan, R.Gılmanov jazasyn ótegennen keıin atalǵan uıymnyń jumysyna qatysýyn odan ári jalǵastyryp qana qoımaı, 2008 jyly osyndaı teris nıettegi dinı uıymdy ashyp, oǵan Qaraǵandy qalasynyń birneshe turǵynyn tartyp, jalǵa alǵan eki páterde olarmen «Hızb-ýt-Tahrır-ál-Islam» partııasynyń ıdeologııasy men maqsattaryn oqytatyn sabaqtar ótkizgen.
Al «Hızb-ýt-Tahrır-ál-Islam» halyqaralyq uıymy 2005 jyly Astana qalasy sotynyń sheshimimen esktremıstik dep tanylyp, Qazaqstan Respýblıkasynyń aýmaǵynda onyń qyzmetine tyıym salyndy jáne eldiń ádilet organdarynda ol tirkelmedi. «Hızb-ýt-Tahrır-ál-Islam» halyqaralyq-dinı ekstremıstik partııasynyń negizgi maqsaty musylman elderinde konstıtýsııalyq ókimet pen jumys istep turǵan qurylymnyń ornyna basynda biregeı basqarýshy – Halıfa turatyn memlekettik qurylymnyń ıslamdyq júıesin ornatýmen biregeı búkilálemdik «Halıfat» memleketin qaıta qurý jáne ornatý bolyp tabylady. Onyń jarǵysynda osy ekstremıstik uıymnyń maqsattary men ádisteri, baǵdarlamasy men qurylymy anyqtalyp, músheleriniń mynadaı mazmundaǵy anty jazylǵan: «Jaratýshy Allanyń atynan Islamnyń senimdi ári shynaıy qorǵaýshysy bolýǵa, osy «Hızb-ýt-Tahrır-ál-Islam» partııasynyń ıdeıalary men mindettemelerin oryndaýǵa ant beremin. Osy partııa qatarynda bolǵan kezde barlyq kúsh-jigerimdi onyń maqsattaryna jetý jolyna jumsaımyn jáne óz sózimdi asa uly Allanyń atymen bekitemin».
Konstıtýsııalyq qurylymdy ózgertýge jáne memlekettiń aýmaqtyq tutastyǵyna iritki salýǵa shaqyratyn, is júzinde ulttyq jáne dinı alaýyzdyqty barynsha ýshyqtyratyn bul kesirli uıymǵa Qazaqstan Respýblıkasynda tyıym salynǵanyn anyq bile tura, Rýstam Gılmanov oǵan kirip, onyń maqsatyna adal bolýǵa ant berip, onyń qyzmetine belsene aralasqan jáne ekstremıstik is-áreketke ózge adamdardy tartqan. Sonymen birge ol dinı jáne ulttyq alaýyzdyqty qasaqana órshite otyryp, bir dindi ekinshisinen artyq sanaǵan jalǵan derekterdi ashyq túrde taratqan, qazirgi konstıtýsııalyq qurylym men eldiń aýmaqtyq tutastyǵyna qastandyq jasaý nıetimen Qazaqstan Respýblıkasynyń aýmaǵynda ıslamdyq «Halıfat» memleketin qurý ıdeıasyn únemi nasıhattaǵan.
R.Gılmanov eki ret óziniń uıaly telefonymen ınternetke shyǵyp, jeke paraqshasynda barshanyń ashyq qaraýy úshin ulttyq dushpandyq pen arazdyqty qozdyratyn beınematerıal ornalastyrǵan. Bul Qazaqstan Respýblıkasy Qylmystyq kodeksiniń 174-babynyń 1-bóligine sáıkes beıbitshilik pen adamzattyń qaýipsizdigine qarsy jasalǵan aýyr qylmys sanatyna jatady.
Serik SATYBALDIN, Qazaqstan Jýrnalıster odaǵynyń múshesi