Sarapshylar jańa Konstıtýsııa jobasy bıliktiń jańa arhıtektýrasyn qalyptastyryp, qoǵamdy odan ári demokratııalandyrýǵa jaǵdaı jasaıtynyn aıtady. Keshe Prezıdenttik ortalyqta ǵylymı qaýymdastyq, damý ınstıtýttary men azamattyq qoǵam ókilderi, Parlament depýtattary, Ulttyq quryltaı músheleri jańa Ata zań jobasynyń negizgi erejelerine saraptamalyq taldaý júrgizdi.
«Jańa Konstıtýsııa jobasynda aıqyndalǵan memlekettiń jańa modeliniń basty ereksheligi – Parlamenttiń, sot júıesiniń jáne azamattyq qoǵamnyń rólin kúsheıtý, sondaı-aq adamdy jáne onyń quqyqtaryn memlekettiń eń joǵary qundylyǵy retinde bekitý. Bul Qazaqstan qoǵamyn jańǵyrtý úderisindegi mańyzdy mejeli kezeń, sondaı-aq Prezıdent Q.Toqaev jarııalaǵan Ádiletti Qazaqstandy qalyptastyrýǵa baǵyttalǵan strategııalyq baǵyttyń logıkalyq jalǵasy sanalady», – dep atap ótti Prezıdent ortalyǵynyń dırektory Baqytjan Temirbolat.
Májilis depýtaty Erlan Saırovtyń aıtýynsha, elimiz óziniń saıası damýynyń sapalyq jańa kezeńine qadam basty. Elde júzege asyrylyp jatqan konsensýs reformalaryn baǵalaý kezinde keıingi onjyldyqta álemde bolǵan aýqymdy geosaıası ózgeristerdi eskerý qajet.
«Kúrdeli halyqaralyq ahýalda memlekettiń birtutas qurylymy men prezıdenttik basqarý formasyn saqtaý elimiz úshin strategııalyq mańyzǵa ıe. Ortalyqtandyrylǵan, tıimdi basqarý júıesi eldiń turaqtylyǵy men terrıtorııalyq tutastyǵyn qamtamasyz etedi», — dedi ol.
Al parlamentshi Ajar Saǵandyqova jańa redaksııadaǵy Negizgi zań jobasynda memleketti júıeniń ortalyǵy retinde qaraýdan adamdy onyń basty máni retinde aıqyndaıtyn túbegeıli betburys jasalǵanyn atap ótti. Onyń aıtýynsha, bul ustanym qujattyń qurylymynan, preambýlasynan, bólimderdiń qaıta qaralýynan, sondaı-aq quqyqtar men bostandyqtardyń kepildikterin kúsheıtýden kórinis tapqan.
Búginde Konstıtýsııa jobasynda dál osy kepildikterge erekshe mán berilip otyr. Atap aıtqanda, adamnyń memleketpen alǵashqy ózara is-qımylynan bastap prosessýaldyq quqyqtarynyń qamtamasyz etilýi, jeke ómiri men derbes derekterin, onyń ishinde sıfrlyq ortada qorǵaý, advokatýranyń rólin nyǵaıtý jáne quqyqtardy qorǵaýdyń túsinikti ári tıimdi tetikterin bekitý kózdelgen.
«Búginde jańa Konstıtýsııa jobasyn qoǵamdyq talqylaý úderisine azamattardyń belsendi qatysýyn eldegi saıası jańǵyrýdyń negizgi kórsetkishteriniń biri retinde qarastyrýǵa bolady. Osy oraıda azamattyq belsendiliktiń artýy konstıtýsııalyq reformanyń qoǵamdyq legıtımdiligin nyǵaıtýǵa yqpal etip qana qoımaı, azamattardyń saıası-quqyqtyq sanasynyń ósýine de áser etedi. Ártúrli qaýymdastyqtar men kásibı toptardyń usynystary Konstıtýsııa jobasynyń sapasyn arttyrýǵa, ony qoǵamnyń naqty qajettilikterine beıimdeýge múmkindik beredi», – dedi Memleket tarıhy ınstıtýtynyń dırektory Nurbek Pusyrmanov.
Jıyndy qorytyndylaı kele, sarapshylar memlekettiń jańa modeli Parlamenttiń, sot júıesi men azamattyq qoǵamnyń rólin kúsheıtýge, sondaı-aq bılik tarmaqtary arasyndaǵy ókilettikterdi neǵurlym teńgerimdi bólýge baǵyttalǵandyǵymen erekshelenetinin aıtty.