«Astana Pro Tım» shabandozy Alekseı Lýsenko «Týr Almaty-2017» kópkúndik tasjoldaǵy xalyqaralyq velojarysynyń jeńimpazy atandy.
Alekseı Lýsenko jarys jolyn 3 saǵat 49 mınýt jáne 52 sekýndta aıaqtady. Máre syzyǵyn ekinshi bolyp fransııalyq veloshabandoz Remı Dı Grıgorı kesse, úzdik úshtikti ırandyq Mırsamad Pýrsedıgolaxar túıindedi.
«Jeńiske jetkenimiz úshin qýanyshtymyz. Komandamyz birlese otyryp, úlken jumys atqardy. Márege deıin birneshe aınalym qalǵanda, komandamnyń arqasynda basymdyq tanytyp, alǵa ozdym. Olarǵa degen zor alǵysymdy bildiremin. Jaqsy nátıjege qol jetkizdik. Degenmen, erteńgi kezeń de ońaı emestigin qaperde ustaýymyz kerek. Jeńiske jetý úshin qolymnan kelgenniń bárin jasaımyn», dedi Alekseı Lýsenko.
Osy jetistiginiń arqasynda Lýsenko «úzdik qazaqstandyq shabandoz» jáne «jalpy klassıfıkasııa jeńimpazy» ataǵyna ıe boldy. Onymen birge, «taý kásibı klassıfıkasııasynyń jeńimpazy» qazaqstandyq Danııl Fomınyx atansa, «sprınterlik klassıfıkasııa jeńimpazy» nomınasııasy ıtalııalyq Alberto Chechınge berildi.
«Almaty týrynyń» birinshi kezeńi QBTÝ ǵımaratynyń mańynda bastaldy. Veloshabandozdar Tóle bı, Fýrmanov, Sátpaev, Baızaqov, Abaı, Jeltoqsan, Ál Farabı, Momyshuly jáne Saıyn kóshelerinen «qalalyq aınalym» ótip, «Almaty Arena» mańynda márege jetti. Olar jalpy 331,7 km qashyqtyqty baǵyndyrdy.
Erteń, qatysýshylar aıtýly dodanyń ekinshi kezeńin «Halyq Arena» ǵımaratynyń mańynda bastap, «VOAD-Ál-Farabı», Tuńǵysh Prezıdent saıabaǵy boıymen ótip, «Medeý» muz aıdynynda aıaqtaıtyn bolady.
Eske sala ketsek, Alekseı Lýsenko «Almaty Týr 2017» kásibı xalyqaralyq velojarysynyń úsh dúrkin chempıony.