Astana Pro Team veloshabandozy Iаkob Fýlsang «Almaty Týry - 2017» ekinshi kezeńiniń jeńimpazy, al onyń áriptesi Alekseı Lýsenko – velododanyń tórt dúrkin chempıony atandy.
Ekinshi kezeńde danııalyq Iаkob Fýlsang 3 saǵat 58 mınýt 01 sekýnd ýaqytpen alǵashqy bolyp máre syzyǵyn kesti. Ekinshi orynda qazaqstandyq Alekseı Lýsenko 12 sekýndqa keshigip jetti. Al úshinshi orynǵa shveısarııalyq sportshy Krıs Stýssı taban tiredi.
Osylaısha, kásibı halyqaralyq velojarystyń jalpy esebi boıynsha Alekseı Lýsenko «Almaty Týry - 2017» velojarysynyń chempıony atandy. Onyń jalpy ýaqyty 07:47:43. Aıtýly dodanyń kúmis júldesimen Alekseıden 55 sekýndqa qalyp qoıǵan, Remı Dı Grıgorı kúpteldi. Al qolany velojarysnyń ekinshi kezeńiniń jeńimpazy Iаkob Fýlsang qanaǵat tutty – 01:04.
- Búgingi báıge qıyn berildi. Bizdiń ujym eki kún boıy keremet óner kórsetti. Búgin Iаkob basymdyq tanytady dep kelisken bolatynbyz, óıtkeni ol taýly aımaqtardyń sheberi, sondaı-aq, óz «surapylyn» sezinýge múmkindik aldy. Márege deıin 5 km qalǵanda, Iаkob birinshi jetý úshin jaǵdaıdy baqyladym. Bul meniń osy maýsymdaǵy sońǵy báıgem, endi týǵan Petropavlovsk qalama oralyp, demalamyn, kelesi maýsymǵa kúsh jınaımyn, - dep bólisti Alekseı Lýsenko.
Sonymen qatar, qazaqstandyq Alekseı Lýsenko "Sprınterlik klassıfıkasııa jeńimpazy", "Jalpy klassıfıkasııa jeńimpazy" jáne "Úzdik qazaqstandyq veloshabandoz" nomınasııalaryn jeńdi. Al "taý kásibı klassıfıkasııasynyń jeńimpazy" ataǵyna Taýnsend Rorı ıe boldy.
Jeńimpazdar men júldegerlerdi marapattaý rásimine qala ákimi Baýyrjan Baıbek qatysyp, velodadany qorytyndylady:
- Biz «Almaty Týr» halyqaralyq velojarysyn osymen besinshi ret ótkizdik. Osy jyly kásibı velododa jańa deńgeıge ósti. Halyqaralyq Velosıpedshiler Odaǵy (UCI) kelisimimen, kópkúndik tasjoldaǵy velojarys ataǵyna ıe boldy. Eýropa jáne Azııa qurlyǵynyń 17 elinen 20 komandanyń qalamyzda óner kórsetýi biz úshin úlken mártebe. Biz velosporttyń damýyna asa kóńil bólemiz. Astana Pro Team komandasyn jeńisimen shyn júrekten quttyqtaımyn. Myń boıaýly Almaty qalasy - álemdik deńgeıdegi alqaly jıyndar men sporttyq sharalar ótetin óńirlik Ortalyqqa aınaldy. Osynaý sporttyq is-sharalar qalalyq ınfraqurylymnyń qarqyndy damýyna, turǵyndar arasynda velosportty nasıhattaýda, ózindik yqpalyn tıgizeri cózsiz, - dep atap ótti qala ákimi Baýyrjan Baıbek.
Velojarystyń ekinshi kezeńi «Halyq Arena» ǵımaratynda bastaldy, jáne «ShAJ-Ál-Farabı» marshrýtymen Tuńǵysh Prezıdenttiń saıabaǵynan «Medeý» taý shańǵysy kýrortyna deıin jalǵasty.
Aıta keteıik, birinshi kezeńde Alekseı Lýsenko jarys jolyn 3 saǵat 49 mınýt jáne 52 sekýndta baǵyndyrdy. Al ekinshi bolyp márege fransýz veloshabandozy Remı Dı Grıgorı jetse, ırandyq Mırsamad Pýrsedıgolaxar qola júldeni qanaǵat tutty.