Memleket basshysy Konstıtýsııanyń 61-babynyń 1-tarmaǵyna sáıkes Parlament Májilisiniń qaraýyna «Qazaqstan Respýblıkasynyń keıbir zańnamalyq aktilerine quqyq qorǵaý qyzmetiniń prosestik negizderin jańǵyrtý máseleleri boıynsha ózgerister men tolyqtyrýlar engizý týraly» zań jobasyn engizdi. Bul týraly akorda.kz habarlady.
Zań jobasy Qylmystyq-prosestik kodekske, «Jedel-izdestirý qyzmeti týraly» jáne «Prokýratýra týraly» zańdarǵa túzetýler engizýdi kózdeıdi. Olar tutastaı alǵanda:
- azamattardyń qylmystyq proseste qorǵalý deńgeıin arttyrýǵa jáne onyń jazalaý sıpatyn tómendetýge;
- advokattardyń prosessýaldyq múmkindikterin keńeıtý arqyly qylmystyq prosestiń jaryspalylyǵyn arttyrýǵa;
- qylmystyq isterdi tergeý tártibin jeńildetýge jáne qylmystyq prosestiń únemdi bolýyn qamtamasyz etýge;
- sotqa deıingi satyda sot baqylaýyn odan ári kúsheıtýge;
- sotqa deıingi tergeý organdary, prokýratýra jáne sot arasyndaǵy ókilettikterdi naqty ajyratýǵa jáne olardyń qaıtalanýyn boldyrmaýǵa baǵyttalǵan.